Դատարանը մերժեց Քոչարյանի եւ մյուսների գործով դատախազին բացարկ հայտնելու միջնորդությունը

Երևանի ընդհանուր իրավասության դատարանը՝ նախագահությամբ Աննա Դանիբեկյանի, մերժեց Ռոբերտ Քոչարյանի գործով դատախազ Կարեն Բիշարյանին բացարկ հայտնելու միջնորդությունը։ 

Դատավոր Աննա Դանիբեկյանը նիստի ավարտին նշեց, որ ստացել է զեկուցագիր, որով տեղեկացվել է, որ դատական նիստի ընթացքում փաստաբան Միհրան Պողոսյանի և դատախազ Գևորգ Բաղդասարյանի միջև տեղի ունեցած վեճի ժամանակ քաղաքացի Նելլի Միքայելյանը վիրավորական արտահայտություն է հնչեցրել, որից հետո դատական կարգադրիչը սաստել է նրան։ Սակայն նա շարունակել է վիրավորական արտահայտություններ հնչեցնել։ Այդ իսկ պատճառով դատարանը որոշեց նրա նկատմամբ կիրառել դատական սանկցիա՝ նրան թույլ չտալով մասնակցել դատական նիստին։