Բացել լրահոսը Փակել լրահոսը
A A

«Ուլիսի» հերթական քայլը

Սպորտ

Վրացի լեգեոնականն ի հաշիվ վնասվածքի հաղթանակ պարգեւեց «Ուլիսին»:

Երեւանի «Ուլիսը» հերթական քայլը կատարեց դեպի մրցանակային տեղեր տանող ճանապարհին' ֆուտբոլի Հայաստանի առաջնության բարձրագույն խմբի 20-րդ տուրում նվազագույն' 1:0 հաշվով պարտության մատնելով իր հիմնական մրցակիցներից մեկին' «Բանանցին»: Միակ գոլը 77-րդ րոպեին խփեց ուլիսցիների վրացի լեգեոնական Գագա Թբիլաշվիլին, ով, ի դեպ, դարպասը գրավելու ժամանակ վնասվածք ստացավ եւ ստիպված լքեց խաղադաշտը:

Խաղից հետո «Բանանցի» գլխավոր մարզիչ Արմեն Գյուլբուդաղյանցը ասաց, որ թիմերն ավելի շատ պայքարում էին, քան ստեղծագործում, ուստի, տրամաբանական էր, որ հաղթեց այն թիմը, որը կարողացավ գոլ խփել: «Ուլիսի» նրա գործընկեր Սեւադա Արզումանյանը նշեց, որ թիմը լավ էր պատրաստվել խաղին, հատկապես բարոյա-հոգեբանական առումով, եւ նախորդ հանդիպման համեմատ ավելի կազմակերպված ու անսխալ գործեց:

Այս տուրում մեծ անակնկալ մատուցեց մրցաշարի ետնապահներից մեկը' Երեւանի «Կիլիկիան», որը իր հարկի տակ առավելության հասավ ոսկե մեդալների համար պայքար մղող «Միկային»' 3:2: Հերթական պարտությունը կրեց անցած տարվա փոխչեմպիոն «Արարատը», որն Աբովյանում զիջեց «Գանձասարին», չնայած մինչեւ 73-րդ րոպեն առջեում էր հաշվի մեջ:

Այժմ առաջնությունում կարճատեւ ընդմիջում է հայտարարվել, քանի որ Հայաստանի ազգային եւ երիտասարդական հավաքականներն առաջիկա օրերին անցկացնելու են համապատասխանաբար աշխարհի եւ Եվրոպայի առաջնության ընտրական փուլի հերթական հանդիպումները: 21-րդ տուրի խաղերը նշանակված են սեպտեմբերի 12-ին:

Մրցաշարային աղյուսակ

Խ         Մ

1, Փյունիկ                  20        47

2, Միկա                     20        41

3, Ուլիս                      20        39

4, Բանանց                20        32

5, Գանձասար          20        29

6, Շիրակ                    20        16

7, Կիլիկիա                20        15

8, Արարատ              20          7