Առողջապահական համակարգում ռուսական թղթաբանություն է
ԱԺ արտահերթ նիստում այսօր «Դեղերի մասին» օրենքում փոփոխություններ կատարելու մասին նախագծի քննարկմանը ՀԱԿ պատգամավոր Նիկոլ Փաշինյանը նշեց՝ եթե այս օրենքի նպատակը դեղերի մատչելիության ապահովումն է, սակայն մի կողմից սահմանվում է հենակետային վերին գին. «Չե՞ք կարծում, որ արդյունքում կլինի մոնոպոլացում: Դեղ վաճառողները սկսելու են արդեն զարտուղի ճանապարհներով ելքեր գտնել: Կարելի է չէ՞՝ նրանց անիմաստ ծախսերից զերծ պահել. Չէ՞ որ դեղը գրանցում եք ու անընդհատ մշտադիտարկման մեջ է այն, սակայն ասում եք՝ հինգ տարին մեկ այն պետք է վերագրանցվի: Մյուս կողմից ամենօրյա ռեժիմով մոնիտորինգի տակ է դեղը, ու ցանկացած պահի կարող է կասեցվի նրա վաճառքը»: Ըստ պատգամավորի՝ այն ամբողջ թղթաբանությունը, որ նախատեսվում է օրենքով ի վերջո մեծ ծախս է դեղ վաճառողների համար. «Իսկ եթե ուզում եք, որ դեղերը էժանանան, ինքնարժեքը նվազեցնելու ուղղությամբ քայլեր եք ձեռնարկում, ապա սա պետք է նկատի ունենաք»: Նիկոլ Փաշինյանին մտահոգում էր նաեւ դեղերի՝ հայերեն բացատրական թերթիկի բացակայությունը. «Դուք կարո՞ղ եք ասել՝ մեր բժիշկների քանի տոկոսն է ախտորոշումը ռուսերենով գրում: Ինչի՞ օրենք չեք ընդունում, որ հայերենով պետք է գրեն, այլապես հինգ հազար դրամով կտուգանվեն: Օրինակ՝ գնում ես սոնոգրաֆիայի, մեկ էլ գրում են՝ կիշեչնի եսիմ ինչ...»: Առողջապահության նախարար Սերգեյ Խաչատրյանը նշեց, որ շատ բժիշկներ այսօր ռուսերենով են գրագրությունն անում, որը նախարարությանը համար այնքան էլ ընդունելի չէ. «Սակայն հիմա գերակշիռ մասը արդեն հայերենով է գրում: Հայերենի խնդիրն ընդամենը տեղեկատվական մատչելիությունն է լուծում: Սակայն ձեր առաջարկն ընդունելի է, կարող ենք քննարկել: Ինչ վերաբերում է հինգ տարին մեկ անգամ դեղերի փորձաքննությանը, ապա ուզում եմ ասել, որ այդ ընթացքում հետազոտությունների արդյունքում այլ ազդեցություններ են հայտնաբերվում եւ նոր փորձաքննության եզրակացության խնդիր ենք ունենում»: Փոխնախարարի խոսքերով՝ օրենսդրական այս փոփոխություններով նաեւ փորձում են շատ կարգավորումներ համապատասխանեցնել միջազգային ստանդարտներին. «Չեմ կարծում, որ այս օրենքը բերում է մենաշնորհի. դաշտը բացարձակապես ազատականացված է: Յուրաքանչյուր ներմուծող պատասխանատվություն է կրելու իր ներմուծած դեղի համար»:
