Կոմիտաս՝ Արծրունու մեկնաբանությամբ (տեսանյութ)
«ՄԵՑՑՈ» ակումբում այսօր Վահան Արծրունու հերթական համերգը առանձնահատուկ է լինելու։ Լրանում է երգիչ - երգահանի «Կոմիտասի տասը հայտնությունը ձայնասկավառակի» 10 ամյակը։
«Շատ կարևոր է ինձ համար այսօրվա համերգը և շատ կարևոր է նշանակություն տալ իրողությանը, որը անգնահատելի է իմ ստեղծագործական կյանքում» ,- ասում է երգիչ - երգահան Վահան Արծրունին։
Երգահանին ոգեշնչել են Կոմիտաս Վարդապետի բանաստեղծությունները, որոնցից 10-ը դարձել են երգեր: Այսօրվա համերգում կհնչեն հենց այդ ստեղծագործությունները:
«Ես փորձեցի իմ տեսլականով Կոմիտասի քնարերգությունը բերել երաժշտական ֆորմա և այդ չափի մեջ էլ տեսնում եմ իմ առաքելությունը՝ ոչ ավել ոչ պակաս», - նշեց երգահանը:
Երգահանին անհանգստացնում է այն, որ Կոմիտաս վարդապետի արժեքն ու արվեստն այսօր չի քարոզում անգամ Վարդապետի անունը կրող ուսումնական հաստատությունը՝ Կոնսերվատորիան։
Ըստ երգահանի Հայաստանին անհրաժեշտ է ամենակարճ օրենքներից մեկը ՝ արվեստի օրենքը, որով արվեստագետն ու արվեստը ՀՀ - ում կամրագրվեն որպես գերագույն պետական արժեք։
Այս առումով երգահանը չի հասկանում նաև մշակույթի նախարարությանը. «Ես չգիտեմ ինչ է անում մշակույթի նախարարությունը և որն է նրա ֆունկցիան»:
