Տարբերությունն ըստ վետերանի
Հայրենական Մեծ պատերազմի վետերան, վաստակավոր մանկավարժ, 90 ամյա Ալբերտ Նալբանդյանին ամենից շատ մտահոգում է այն փաստը , որ մեր երիտասարդները խուսափում են զինծառայությունից:
«Այն հայրենասիրությունը, որ մենք ունեինք պատերազմի ժամանակ, շատ կուզենայի, որ ունենար նաեւ մատաղ սերունդը: Մենք կամավոր մեկնեցինք ռազմաճակատ» ,- «Ա1+»-ի հետ զրույցում նշեց Ալբերտ Նալբանդյանը:
19 տարեկան հասակում նա կամովին մեկնել է ռազմաճակատ եւ հասել մինչեւ Ավստրիա;
Ալբերտ Նալբանդյանը պատերազմի ժամանակ կապավոր է եղել եւ արժանացել է գերագույն գլխավոր հրամանատար Ստալինի շնորհակալագրին:
Ալբերտ պապը Ավստրիայի Բադենբադեն քաղաքի մոտ գերի է ընկել եւ հպարտությամբ է նշում, որ իրեն ազատել են հայ լեգիոնականները:
Վերադառնալով հայրենիք` բարձրագույն կրթություն է ստացել եւ արժանացել վաստակավոր մանկավարժի կոչմանը:
90- ամյա պատերազմի վետերանը ստանում է 100.000 դրամ թոշակ: Նա նշում է, որ չի սիրում նվնվալ, սակայն եթե զավակները չօգնեն, ինքն ու կինը այդ գումարով չեն կարող գոյատեւել:
Որպես Հայրենական պատերազմի մասնակից` Ալբերտը Նալբանդյանը տրոյլեբուսներից եւ ավտոբուսներից օգտվում է անվճար: Երբեմն միկրոավտոբուսների վարորդները շատ ջերմ են գտնվում եւ ուղեվարձ չեն վերցնում: Հայրենական պատերազմի վետերանը շատ է ոգեւորվում դրանից:
Ի դեպ, Ալբերտ Նալբանդյանը ցանկացել է մասնակցել նաեւ Ղարաբաղյան պատերազմին, սակայն տարիքի պատճառով թույլ չեն տվել:
