Քաղաքապետարանը՝ այսօրվա փլուզման մասին
Խանջյան 20 հասցեում փլուզված կիսակառույցում այսօր շինարարություն չպետք է ընթանար։
Այս մասին «Ա1+» - ին հայտնեց Երևանի քաղաքապետարանի տեղեկատվության և հասարակայնության հետ կապերի վարչության պետ Արթուր Գևորգյանը։
« «Մանկական զվարճանքների կենտրոն» ՍՊԸ - ին և «Լենա Թովմասյան» ՍՊԸ - ին պատկանող շենքին թույլատվություն տրվել էր բացօթյա սրճարանի եւ զվարճալիքների կենտրոն կառուցելու համար։
Թույլտվությունը տրվել է 23.12.2009թ, ժամկետը երկարացվել է 17.03.2011թ: Վերահսկող խումբը հերթական շրջայցերի ժամանակ պարզել է , որ կա ժամկետի խախտում և կա նոր ժամկետի կարիք։ Դրա հիմքով կազմվել է արձանագրություն և դադարեցվել է շինարարությունը» ,-բացատրեց նա։
Արթուր Գևորգյանի խոսքով՝ քաղաքապետարանը նշանակել է մոտ 2 մլն դրամ տուգանք. « Դրանից հետո պետք է տվյալ կառույցը նորից դիմեր շինարարության ժամկետը ևս մեկ անգամ երկարացնելու համար, բայց չի դիմել և շարունակել է շինարարությունը» ։
Հիշեցնենք, որ այսօր փլուզվել էր Խանջյան 20 հասցեում գտնվող կիսակառույց շենքի 3- րդ հարկը։
Ի դեպ, կիսակառույցը, որոշ տեղեկություններով, պատկանում է գործարար Հարություն Փամբուկյանին։
Շինարարությունը իրականացնումն էր «Չիլինգարյան դիզայն և շինարարություն» ՍՊԸ-ն։
