«Ձեզանից մեկն էլ ես եմ»
8-րդ մանկապատանեկան միջազգային կինոփառատոնում «Ձեզանից մեկն էլ ես եմ» խորագրի ներքո ներկայացվում են սահմանափակ հնարավորություններ ունեցող երեխաների մասին ֆիլմեր, որտեղ հերոսները հենց այդ երեխաներն են :
«Հարկավոր է հաշմանդամ երեխաներին կապել մշակույթի հետ, նրանցից շատերը ավելի պայծառ ուղեղ են ունենում, քան սովորական երեխաները: Չինաստանում մեծ ուշադրություն են դարձնում այսպիսի երեխաներին և հատուկ խմբակներում նրանց ներգրավելով ինտեգրում հասարակությանը»,-ասաց Չինաստանի մանկական ֆիլմերի ասոցիացիայի ներկայացուցիչ Լիու Ջուանը:
Ըստ բանախոսների՝ այս երեխաները պիտի սովորական միջնակարգ դպրոցում սովորելու հնարավորություն ունենան:
«Հայաստանում ներառական 81 դպրոց կա, բայց փաստ է նաև որ յուրաքանչյուր 5 հաշմանդամ երեխայից 1-ը դպրոց չի հաճախում: Հայաստանում պետք է ավելացնել ոչ միայն ներառական դպրոցների, այլ նաև մանկապարտեզների թիվը»,-կոչ արեց Հայաստանում ՅՈՒՆԻՍԵՖ-ի ներկայացուցիչ Հենրիետ Արեսը:
Հայաստանում մոտ 8000 հաշմանդամ երեխա կա, փառատոնի կազմակերպիչները ցանկանում են բացահայտել նրանց հնարավորությունները:
Փառատոնի տնօրեն Նունե Մանուկյանը հավաստեց ,որ այս ծրագիրը շարունակական է լինելու:
Մանկապատանեկան ֆիլմերի միջազգային կինոփառատոնի փակումը տեղի կունենա հոկտեմբերի 24-ին:
