Արամ Սարգսյան «Ես շատ կուզեմ, որ Քոչարյանն առաջադրվի»
«Ա1+» ը զրուցեց «Հանրապետություն» կուսակցության քաղխորհրդի նախագահ Արամ Սարգսյանի հետ:
-Պարոն Սարգսյան, «Հանրապետություն» կուսակցությունը ե՞րբ կսկսի ակտիվ գործունեությունը, ինչո՞վ է զբաղված այսօր կուսակցությունը:
-Տարածքային կառույցների հետ ենք հանդիպում: Մինչեւ Միացյալ Նահանգներ մեկնելը ես այցելել եմ մեր Եղվարդի կառույց, հանդիպել եմ ակտիվի հետ, շատ գոհ եմ այդ հանդիպումից: Այս շփումների ընթացքում պարզվեց նաեւ, որ հասարակությունը սպասելիք ունի, եւ համապատասխան իրավիճակներում բողոքական զանգվածը գտնելու է իրական ընդդիմադիր գործչին, եւ այնպես, ինչպես 2003-ին, 2008-ին' կանգնելու է նրա կողքին: Հանդիպումները շարունակելու ենք. առաջիկա ուրբաթ օրը ունենք հանդիպում մեր' Արարատի ակտիվիստների հետ, այդ հանդիպումների շարքը շարունակվելու է մինչեւ դեկտեմբեր ամիսը: Դեկտեմբերի վերջին տեղի կունենա համագումարը, որտեղ մենք մեր դիրքորոշումները կարտահայտենք թե առաջիկա նախագահական ընտրությունների, թե առաջիկա զարգացումների, թե մեր պլանների մասին:
- Շատ երկար ժամանակ կուսակցությունը համագումար չի արել, պատճառը ո՞րն է:
-Դժբախտաբար այո, բազմաթիվ անգամներ նախատեսել ենք համագումար անել, սակայն քաղաքականզարգացումները գնացել են այնպես, որ քաղաքական առումով տվյալ պահին նպատակահար չի եղել համագումար անելը: Հիմա գտնում ենք, որ թե «Կուսակցությունների մասին» օրենքի պահանջով, թե քաղաքական առումով նպատակահարմար է համագումար հրավիրել: Ինչ վերաբերում է քաղաքական խորհրդին, ապա ամեն երկուշաբթի եւ հինգշաբթի խորհուրդը հավաքվում է, տեղի են ունենում նիստեր,մենք լուրջ քաղաքական ուժ ենք քաղաքական դաշտում, ասելիք ունենք, անելիք ունենք, ու այս երկրում շատ անելիք կա: Մենք հակված ենք հասարակական ակտիվությունը բարձրացնելու, որովհետեւ փոփոխություն ենք ուզում:
-Իսկ Սմբատ Այվազյանը, որպես խորհրդի անդամ մասնակցո՞ւմ է նիստերին, քանի որ մամուլում հրապարակումներ եղան, որ նա առանձին թեւ ունի եւ չի կիսում ձեր մոտեցումները տարբեր հարցերում:
-Սմբատ Այվազյանը չի մասնակցում նիստերին, բայց չի ասել' կիսում է, թե չի կիսում: Նա ասել է, որ գերադասում է հասարակական գործունեությամբ զբաղվել, ես էլ հարգում եմ իր մոտեցումը եւ որեւէ բան չեմ տեսնում այստեղ:
-Համագումարում կորոշվի, թե ի՞նչ եք անելու նախագահական ընտրություններում, դուք անձամբ առաջադրվելու եք, թե ոչ:
-Այո: Բոլոր հարցերի պատասխանը կտա համագումարը:
-ՀԱԿ-ի առաջիկա հանրահավաքին որպես քաղաքացի դուք կամ ձեր կուսակիցները, կամ համակիրները կմասնակցեն:
-Ես չէի ցանկանա անդրադառնալ որեւէ կուսակցության գործունեության, առավելեւս, որ ես որեւէ հանրահավաքի մասին տեղյակ էլ չեմ: Մենք զբաղվում ենք մեր գործերով, մենք գտնում ենք, որ լուրջ ասելիք ու անելիք ունենք, հակված ենք մեր անելիքի մասով գործունեություն ծավալել:Իսկ մինչ մեր համագումարը որեւէ քաղաքական ուժի, կուսակցության հետ ներքաղաքակայն բանակցությունների, միավորումներ ձեւավորելու եւ այլն քննարկումների չենք մասնակցելու:
-Այսօր կարծես մոդա է ասել այս, կամ այն քաղաքական ուժը վայելում է Արեւմուտքի, Ռուսաստանի աջակցությունը: Հիմա ԱՄՆ ձեր այցից հետո կարելի է ասել, որ դուք վայելում եք Արեւմուտքի աջակցությունը:
-Ի տարբերություն Ռուսաստանի, Արեւմուտքը միշտ կանգնում է ժողովրդի կողքին, ոչ թե անհատի: Վերջին տարիների զարգացումները դրա վառ ապացույցն են:
-Իսկ մեր ժողովրդի կողքին կանգնե՞ց 2003թվականին, 2008-ի մարտի մեկից հետո:
-2004 թվականի ապրիլի 12-ից հետո, մարտի 1-ից հետո նայեք Պետդեպարտամենտի հայտարարությունները, համեմատեք մնացած պետությունների, ԱՊՀ անդամ երկրների հայտարարությունների հետ, կտեսնեք, թե ում կողքին կանգնեց ԱՄՆ-ն: Եթե մարդիկ կան, ում թվում է, թե ԱՄՆ-ն ինքն է գալու այստեղ փոփոխություններ անելու, կամ տարածում են, թե Արեւմուտքն է փոփոխություններ անողը Մերձավոր Արեւելքում, ես այդ մոտեցումը չեմ կիսում: Եվ ես դեմ էլ կլինեմ, որ գան այստեղ, ինչ-որ բան անեն. Հայ ժոովուրդն ինքն է որոշելու իր ապագան, ուզում է ժողովրդավարություն, թե ոչ, պայքարելու է իր անկախության համար, թե ոչ, անկախությունն իր համար արժեք է, թե ինքն իրեն ուրիշի հովանավորության տակ է պաշտպանված զգում, դա իր որոշելու գործն է: Այս առումով ես գտնում եմ, որ արեւմուտքի դիրքորոշումը ճիշտ է:
-Վերջին շրջանում խիստ ակտիվացել են իրավապահ մարմիններն ու իշխանության պատժիչ գործողությունները: Կաշառքի դեպքեր են բացահայտվում, ձերբակալություններ են տեղի ունենում, Օսկանյանին մեղադրանք առաջադրվեց: Ի վերջո, ինչպե՞ս եք գնահատում այս գործողությունները, որպես նախընտրական քարոզչական հնա՞րք, թե՞ վերջապես սկսել են պայքարը այդ երեւույթների դեմ:
-Ինձ մոտ տպավորություն է, որ իշխանությունները վերջին տասը տարիներին բացակայում էին Հայաստանից, այսօր նոր եկել են ու զարմացած ասում են, վայ, դեղերի բիզնեսում ինչ է կատարվում, վայ, մեր բանակը բրիկետներով է սնվել. իրական տավարի միսը թողած' գոմեշի միս են կերել: Այս թատրոնները նույնիսկ ամենաշարքային, ամենապրիմիտիվ, ընդհանրապես քաղաքականությամբ չզբաղվող մարդու մոտ հավատ չեն ներշնչում, իմ մոտ ոնց կարող են հավատ ներշնչել: Իհարկե, որեւիցե օրվանից պետք է սկսել այդ գործընթացը, բայց դա պետք է անի այն մարդը, ով ինքը արդար ճանապարհով է եկել իշխանության:Այն մարդը, որ իշխանության գալու համար ընտրակաշառք է բաժանել, մոբիլիզացրել է ամբողջ ադմինիստրատիվ ռեսուրսը՝ ասելով, թե եթե ուզում եք աշխատեք' քվեարկեք իմ օգտին, այլապես կուսակցությունից կհեռացնեմ, գործից կհեռացնեմ, ձեր հարազատներին կճնշեմ, կկալանավորեմ, ոնց կարող է իրական պայքար մղել նման երեւույթների դեմ: Միայն արդար ընտրություններով ձեւավորված իշխանությունը կարող է պայքարել կոռուպցիայի դեմ, կոռուպցիայի հիմքը կեղծված ընտրություններով, փողով ձեւավորված իշխանությունն է: Հայ ժողովրդին ոչ թե գործող իշխանությանն այլընտրանք է պետք, այլ արդար ձեւավորված իշխանություն: Ժողովուրդը շատ իմաստուն, գիտակցված ընտրություն կանի, թող ուղղակի արդար ընտրություն անցկացնեն:
-Սարգսյան-Քոչարյան սրվող հակասություն տեսնո՞ւմ եք, թե՞ դա էլ խաղ է:
-Չեմ էլ ուզում վերլուծեմ, եթե Քոչարյանն ուզում է' թող առաջադրվի: Օրինակ, ես դրան շատ կողմ եմ, այդ ժամանակ կերեւա, թե որ կուսակցություններն է հիմնադրել Քոչարյանը, եւ այդ կուսակցություններն ինչ պահվածք ունեն Քոչարյանի հանդեպ, Քոչարյանը կտեսնի, թե այս ժողովուրդը որքանով է իրեն հարգում կամ արհամարհում. հոյակապ հնարավորություն է, որ Քոչարյանը չունի ադմինիստրատիվ ռեսուրս, ու իր իրական գնահատականը կերեւա, եթե արդար ընտրություններ լինեն, իմ խորին համոզմամբ, էս երկրում ամենա-ամենավերջին տեղում կլինի Ռոբերտ Քոչարյանը, նրանից առաջ Սերժ Սարգսյանը, նոր մյուսները:
Զրուցեց Դիանա Մարկոսյանը
