Ստուգումներ են սկսվել
Հարավկովկասյան երկաթուղում անցնում է ենթակառուցվածքի աշնանային զննումը: Հատուկ հանձնաժողովը՝ «ՀԿԵ» ՓԲԸ գլխավոր տնօրեն Վիկտոր Ռեբեցի գլխավորությամբ, այսօր կքննի Այրումից մինչև Գյումրի երկաթուղային հատվածը:
Մինչև նոյեմբերի 15-ը անցնելու է գծի, հարակից տարածքների, արհեստական կառույցների, էներգամատակարարման, ավտոմատիկայի, տելեմեխանիկայի և կապի միջոցների զննումը:
Հոկտեմբերի 20-ից մինչև նոյեմբերի 30-ը զննման կենթարկվի ՀԿԵ-ի լոկոմոտիվային և մոտորավագոնային ամբողջ շարժակազմը: Զննման ընթացքում հատուկ ուշադրություն է դարձվելու հակահրդեհային համակարգերի, գնացքների անվտանգ երթևեկությունն ապահովող սարքավորումների վիճակին:
Ենթակառուցվածքի զննման ժամանակ հանձնաժողովների ուշադրության կենտրոնում կլինեն կարևորագույն հանգույցներում և կայարաններում ձնամաքրման միջոցների պատրաստվածությունը, վերանորոգման աշխատանքների ընթացքը, կադրերի, ծառայողական-տեխնիկական շենքերի և կոմունալ տնտեսության պատրաստվածության մակարդակը, ինչպես նաև երկաթուղայինների համար աշխատանքի և հանգստի պայմանների ստեղծումը:
Այս մասին ՀԿԵ մամլո ծառայությունը։
