Աղվան Հովսեփյանի գործն էլ ուղարկվեց Հակակոռուպցիոն դատարան

 Նախկին գլխավոր դատախազ, ՔԿ նախկին նախագահ Աղվան Հովսեփյանի  գործը Երեւան քաղաքի ընդհանուր իրավասության դատաանի  դատավոր Մնացական Մարտիրոսյանը ընդդատության կարգով որոշել է ուղարկել Հակակոռուպցիոն դատարան։

Դատավորն իր որոշումը մեկնաբանել է նրանով, որ «Ապօրինի ծագում ունեցող գույքի բռնագանձման մասին» օրենքի հիման վրա գույքի բռնագանձման հայցերով հարուցված քաղաքացիական գործերը և կոռուպցիոն հանցագործությունների վերաբերյալ գործերը վերաբաշխվում են հակակոռուպցիոն դատարանի համապատասխան մասնագիտացում ունեցող դատավորների միջեւ։

  Մնացական Մարտիրոսյանը նաեւ նշել է, որ տվյալ գործը չի անցել դատաքննության փուլ, ուստի գործը ենթակա է վերաբաշխման։

  Հիշեցնենք, որ Հովսեփյանը մեղադրվում է առանձնապես խոշոր չափերով` 190 մլն դրամ կաշառք ստանալու և խարդախության եղանակով 800 մլն դրամ գույքի հափշտակություն կատարելու մեջ: Նա մեղադրվում է նաև հանցավոր ճանապարհով ստացված 1 միլիարդ 299 միլիոն դրամի գույքը օրինականացնելու համար:

Նա անազատության մեջ է  2021թ սեպտեմբերի 7-ից։  2022 թ օգոստոսի 11-ին դատարանը Հովսեփյանի նկատմամբ որպես խափանման միջոց է կիրառել գրավը՝ գրավի չափ սահմանելով 100 մլն դրամը եւ  ստորագրությունը՝ չհեռանալու մասին։