Եթե կառավարությունը հաստատի վարչապետի ներկայացրածով, բազմաթիվ ուսանողներ կտուժեն. ԵՊՀ ուսխորհրդի նախագահ
Աջակցիր «Ա1+»-ինՈսանողներին աջակցություն ցուցաբերելու առաջարկն այն տեսքով ,ինչպիսին ներկայացրել է ՀՀ վարչապետը, մտահոգել է ԵՊՀ ուսանողական խորհրդի նախագահին։
«Ա1+»-ի հետ զրույցում Դավիթ Ափոյանը նշում է՝ կան բացեր և ուսանողության պահանջը այլ է եղել:
« Վարչապետի հայտարարությունը դեռ որոշման տեսք չի ստացել և այսօրվա հայտարարության նպատակը այն է, որ մինչև հարցը կառավարության հաստատմանը դրվելը նշված խնդիրներին անդրադառնան , որովհետև եթե կառավարությունը նման տեսքով հաստատի ապա բազմաթիվ ուսանողներ կտուժեն և այս նախաձեռնությունը իր նպատակին չի ծառայի»,- նշում է Դավիթ Ափոյանը
Այսօր վարչապետ Նիկոլ Փաշինյանը իր ֆեյսբուքյան էջում հանդես եկավ հայտարարությամբ, որ պետությունը հակաճգնաժամային 14-րդ միջոցառման շրջանակներում ուսանողներին աջակցություն կցուցաբերի:
Աջակցության մեխանիզմը լինելու է հետևյալը՝ ավարտական կուրսի ուսանողները, ովքեր ունեն 90+ՄՈԳ, կստանան ուսման վարձի 100% փոխհատուցում, ոչ ավարտական կուրսի ուսանողները, ովքեր ունեն 90+ ՄՈԳ, կստանան ուսման վարձի 75% փոխհատուցում, 80+ՄՈԳ ունեցողների համար ուսանողական վարկերի տոկոսները կզրոյացվեն, իսկ 80-ից ցածր ՄՈԳ ունեցողների համար ուսանողական վարկերը հասանելի կլինեն 4%-ով:
Այսինքն՝ ըստ ուսանողական խորհրդի նախագահ Դավիթ Ափոյանի՝ առաջնայնությունը տրված է ոչ թե այս իրավիճակում տուժած ընտանիքներին, այլ բարձր առաջադիմություն ունեցող ուսանողներին:
« Իհարկե, բարձր առաջադիմությունը միշտ էլ խրախուսելի է, բայց այս գործողությունները նպատակուղղված չեն բարձր առաջադիմությունը խրախուսելու , այլ նրան, որ տուժած ուսանողներին ընդառաջեն, որպեսզի նրանք կարողանան իրենց վարձը վճարել»,- հայտնում է Դավիթ Ափոյանը:
ԵՊՀ ուսանողական խորհրդի նախագահ Դավիթ Ափոյանը նշում է, որ ուսանողության պահանջը եղել է այլ: Նրանք ապրիլի 2-ին բաց նամակով դիմել էին ՀՀ կառավարությանը։
«Ի սկզբանե պահանջը եղել է, որ ընդառաջեն ուսանողությանը ստեղծված իրավիճակում և հատկացնեն մինչև 25% ուսման վարձի զեղչ, և եթե ոչ բոլորին, ապա առնվազն այն ուսանողներին, ում ընտանիքները տուժել են ստեղծված իրավիճակում»,- նշում է Դավիթ Ափոյանը:
Հեռակա համակարգում սովորող ուսանողներին 14-րդ միջոցառման շրջանակներում անդրադարձ չի եղել։
«Իմ կարծիքով արդարացի կլինի, եթե հեռակա համակարգում սովորող ուսանողների վարձերն էլ զեղչվեն: Հեռակա համակարգում սովորող ուսանողները մեծ մասամբ աշխատում են և նրանցից շատերը ստեղծված իրավիճակում չեն կարողանում»,- ասաց Դավիթ Ափոյանը:
