Բրազիլիան 10 ամիս անց ավարտեց մարզադաշտերի շինարարությունը
Ֆուտբոլի աշխարհի 2014 թվականի առաջնության ավարտից 10 ամիս անց Բրազիլիայի կառավարությունը հայտնել է, որ այդ մրցաշարի անցկացման համար նախատեսված մարզադաշտերում ավարտվել են բոլոր շինարարական աշխատանքները: Ինչպես տեղեկացնում է BBC-ն, վերջերս լիովին շահագործման են հանձնվել Սան Պաուլուի եւ Կուրիտիբայի մարզադաշտերը, որոնք աշխարհի առաջնության ժամանակ կիսակառույցներ են եղել: Բացի այդ, ծախսերը խնայելու համար երկրի կառավարությունը հրաժարվել է շարժական տանիքների կառուցումից: Ի դեպ, ըստ պետական օրենսդրության, այդ մարզադաշտերից օգտվող ակումբները խաղերի տոմսերի վաճառքից ստացված գումարները չեն կարող իրենց նպատակների համար ծախսել, քանի դեռ չեն մարվել դրանց կառուցման համար արված գումարները: Նշենք, որ Բրազիլիայի կառավարությունը մարզադաշտերի կառուցման համար ծախսել է մոտ 3 մլրդ դոլար:
