Զինված ադրբեջանցի զինծառայողը երեխաների աչքի առաջ կրակել է նրանց մորը․Կարապետյանի ելույթը՝ ԵԽԽՎ-ում (տեսանյութ)
Աջակցիր «Ա1+»-ին«Ուժեղ Հայաստան» խմբակցության ղեկավար Նարեկ Կարապետյանի ելույթը ԵԽԽՎ-ում․
Այսօր ես ուզում էի խոսել առողջապահության ոլորտի խնդիրների մասին, բայց տեղի ունեցավ մի ցնցող բան, և դրա փոխարեն ես պետք է խոսեմ այդ մասին։ Ուղիղ 24 ժամ առաջ Հայաստանում տեղի ունեցավ սարսափելի դեպք՝ մի երկրում, որը վերջին տարիներին ամեն ինչ արել է իր բոլոր հարևանների հետ լավ հարաբերություններ կառուցելու համար։ Զինված ադրբեջանցի զինծառայողը հատել է Հայաստանի սահմանը, մտել հայ ընտանիք և երեք երեխաների աչքի առաջ կրակել մորը։
Սա վերջին շրջանում արդեն երկրորդ դեպքն է, երբ հայ խաղաղ բնակիչները անմիջականորեն հարձակման են ենթարկվում հարևան երկրի զինծառայողների կողմից։ Գիտե՞ք՝ ինչու են այդ զինվորներն այդքան վստահ իրենց զգում։ Որովհետև պատիժ չկա։ Միջազգային դատարաններն ու կառույցները, որոնք պետք է պատասխանատվության ենթարկեին Լեռնային Ղարաբաղում հայերի էթնիկ զտման համար պատասխանատուներին, ոչինչ չարեցին։
Մի քանի հարյուր կիլոմետր հեռավորության վրա՝ Հունգարիայում, ադրբեջանցի զինծառայողը ՆԱՏՕ-ի զորավարժությունների ժամանակ կացնով սպանեց քնած հայ զինծառայողի, սակայն նրան արտահանձնեցին Ադրբեջանին։ Մարդասպանը նույնիսկ մեկ օր չանցկացրեց ադրբեջանական բանտում։ Փոխարենը Ադրբեջանի նախագահը նրան դիմավորեց, նրան հերոսի կոչում շնորհեց և թույլ տվեց ազատ շրջել Բաքվի փողոցներում։ Նրան հետ ուղարկելով՝ ԵՄ անդամ պետությունը, անզգուշաբար, կանաչ լույս տվեց այս վտանգավոր վարքագծին։
Դրա պատճառով մենք կրկին տեսնում ենք նույնը տեղի ունենալիս երեկ։ Ադրբեջանի զինծառայողները մտնում են Հայաստան, հարձակվում խաղաղ քաղաքացիների վրա, իսկ երբ նրանց արտահանձնում են Ադրբեջանին, այնտեղ նրանց ընդունում են որպես հերոսների։ Այս վտանգավոր շրջանը պետք է ավարտվի։ Եվրոպական համայնքը չի կարող պարզապես դիտորդ մնալ։
Բռնություն իրականացնողները երբեք չպետք է հերոսացվեն։ Հայաստանի խաղաղ բնակիչների կյանքը չափազանց կարևոր է։ Ո՛չ արտահանձնմանը, եթե արդարադատության երաշխիքներ չկան։ Այո՛՝ միջազգային արդարադատությանը։
Ոչ պաշտոնական թարգմանություն
