Վիկտոր Օրբանն ընդունել է ընտրություններում իր պարտությունը

Հունգարիայում խորհրդարանական ընտրություններում հաղթում է ընդդիմադիր «Տիսա» կուսակցությունը, Վիկտոր Օրբանը ընդունել է պարտությունը։

Հունգարիայում խորհրդարանական ընտրություններում ընդդիմադիր «Տիսա» կուսակցությունը առաջատար է՝ ձայների մոտ երկու երրորդի հաշվարկից հետո։ Վարչապետ Վիկտոր Օրբանը ընդունել է պարտությունը։

Նախնական տվյալներով՝ խորհրդարանական ընտրություններում առաջատար է եվրոպամետ և աջակենտրոն «Տիսա» կուսակցությունը, որը գլխավորում է Պետեր Մադյարը։ Ինչպես հայտնում է Հունգարիայի Ազգային ընտրական գրասենյակը, քվեաթերթիկների 72.44%-ի հաշվարկից հետո «Տիսան» ստանում է 199 մանդատներից 138-ը։

Երկու երրորդ մեծամասնությունը կուսակցությանը հնարավորություն կտա փոփոխություններ կատարել Սահմանադրությունում և առանցքային օրենքներում։

Պահպանողական «Ֆիդես» կուսակցությունը, որը գլխավորում է վարչապետ Վիկտոր Օրբանը, այս պահին ստանում է ընդամենը 54 մանդատ։ Եվս յոթ մանդատ կարող է բաժին հասնել ծայրահեղ աջ «Մեր հայրենիք» կուսակցությանը։

Ընտրությունների արդյունքները կարող են փոփոխվել քվեների հետագա հաշվարկի ընթացքում։