Տնտեսական աճը ցածր կլինի
Համաշխարհային տնտեսության աճի տեմպերը 2011թ. կկազմեն 4.4%, ինչը 0.2 տոկոսով բարձր է հոկտեմբերի կանխատեսումներից:
Սրանք ԱՄՀ հունվարին վերանայված կանխատեսումներն են, որոնք հրապարակվել են ՀՀ Կենտրոնական բանկի ներկայացրած «Դրամավարկային քաղաքականության 2011թ. 1-ին եռամսյակի ծրագրում»:
Ըստ այդ տվյալների` զարգացած եւ զարգացող երկրներում գնաճի բարձր տեմպերը կպահպանվեն եւ 2011թ. կկազմեն համապատասխանաբար 1.6% և 6.0%: Ի դեպ, ինչպես 2010 թ., այնպես էլ 2011 թ.-ին համաշխարհային տնտեսության աճը կպայմանավորեն հենց զարգացող երկրները:
Աշխարհի առաջատար եւ Հայաստանի հիմնական գործընկեր երկրներից Եվրոգգոտու տնտեսական աճի սպասվող տեմպը 2011թ. համար կանխատեսվում է 1.5 տոկոս՝ 2010 թ.-ի 1.8%-ի փոխարեն:
Ինչ վերաբերում է միջազգային ապրանքային շուկաներում արձանագրվող գներին, ապա ըստ ԱՄՀ կանխատեսումների` 2011թ. հիմնականում կպահպանվի 2010 թ. վերջին ձեւավորված գների բարձր մակարդակը:
Նավթի գինը կբարձրանա
Միեւնույն ժամանակ, առանձին ապրանքային շուկաներին ներհատուկ զարգացումները կպայմանավորեն տվյալ ապրանքների գծով հնարավոր առավել բարձր կամ ցածր գնաճային ռիսկեր:
Օրինակ` 2011 թ. կանխատեսվում է նավթի միջազգային գների որոշակի աճ, որը կձևավորվի դեռևս հունվարին արձանագրված շուրջ 98 ԱՄՆ դոլարի շրջակայքում՝ 1 բարելի դիմաց:
Համաձայն Էներգիայի միջազգային կազմակերպության գնահատումների՝ 2011թ. հիմնականում կպահպանվի 2010թ. վերջին արձանագրված նավթի համաշխարհային պահանջարկի բարձր մակարդակը:
2011թ. կաճեն նաեւ արդյունաբերական և թանկարժեք մետաղների գները: Մասնավորապես՝ պղնձի միջազգային գները կձևավորվեն 9000 ԱՄՆ դոլարի սահմաններում: Պղնձի միջազգային գների կանխատեսվող վարքագիծը կպայմանավորվի զարգացող երկրների` հատկապես Չինաստանի կողմից ներկայացվող մեծածավալ պահանջարկով, առկա պաշարների ցածր մակարդակով եւ առաջարկի սահմանափակությամբ:
