«ՀՀԿ-ն իր երգը վաղուց է երգել» (տեսանյութ)
Հայաստանի վերաբերյալ Թուրքիայի հայտարարություններում ԱԺ ՀՀԿ խմբակցության ղեկավար Գալուստ Սահակյանը մեղմություն է նկատում: «Ա1+»-ի հետ զրույցում այսօր նա փորձեց հիմնավորել թուրքական կողմի մեղմությունը, ինչպես նաեւ պատասխանեց «Ա1+» այլ հարցերին:
- Աստրախանում Սերժ Սարգսյան-Իլհամ Ալիեւ հանդիպման ընթացում ընդունված հռչակագիրը Թուրքիան ողջունում է միայն այն պատճառով, որ գնում է ընտրությունների: Թուրքիան նման դիվերսիոն մոտեցումներով այսօր աշխարհին փորձում է համոզել, որ իրենք վերափոխվել են: Այսօր Թուրքիան ներկայանալու խնդիր ունի նաեւ իր ժողովրդին:
- Ձեր կարծիքով, Թուրքիայում նախատեսված ընտրություններո՞վ էր պայմանավորված նաեւ «Հզոր Թուրքիա» կուսակցության այցը Հայաստան:
- Այո: «Հզոր Թուրքիան» նախ իր երկրում պետք է հայ-թուրքական սահմանի բացման հարցը լուծեր եւ նոր գար մեր երկիրը: Այսօր Թուրքիան աշխարհին փորձում է ցույց տալ, իր համար ժողովրդավարական արժեքներն են առաջնայինը` չմտածելով, որ մենք արդեն այնքան խութեր ենք հաղթահարել, որ նման բաներն անմիջապես զգում ենք: Դրանք Թուրքիայի հերթական պրովոկացիաներն են: Թուրքիայի իշխանություններն այսօր իրենց երկրում վերարտադրելու խնդիր ունեն:
- Ինչպե՞ս եք վերաբերում այն հանգամանքին, որ Թուրքիան իրեն վտանգ սպառնացող երկրների «Կարմիր գրքից» հանել է Հայաստանը:
- Մենք, իհարկե, նման գիրք չունենք, բայց եթե ունենայինք, իրենք մեր «Սեւ գրքում» կլինեին, որովհետեւ խաբուսիկ դիվանագիտություն են պարտադրում ամբողջ աշխարհին:
- Ինչպե՞ս եք վերաբերում այն լուրերին, որ դեկտեմբերին ԼՂ հարցով Աստանայում կողմերին «ճանապարհային քարտեզ» է ներկայացվելու:
- Չեմ կարծում, որ կներկայացնեն: Աստրախանում ընդունված ռազմագերիների փոխանակման մասին հռչակագիրն էլ շատ անազնիվ է, որովհետեւ փաստաթղթում ասվում է դիակների փոխանակում: Մենք «դիակների փոխանակում» արտահայտությունը չենք ընդունում, մենք ասում ենք` «դիակների վերադարձ»: Այսինքն, ցանկացած արգումենտ թուրք հասարակությունը` հանձինս Ադրբեջանի, վերցնում է եւ միայն գույներով է ներկայացնում աշխարհին: Ես համոզված չեմ, որ ադրբեջանական կողմը ինչ խոստացվել է հռչակագրով կիրականացնի: Նույն խաղերն է լինելու, նորից պատերազմի սպառնալիքներ են հնչելու Ադրբեջանի կողմից, բայց ես համոզված եմ, որ յուրաքանչյուր բանակցային հանդիպումից հետո ալիեւյան կլանը պարտվող է դուրս գալիս:Կարծում եմ, որ միջազգային հանրությունը առաջիկա տարիներին իր եզրակացությունը կանի ԼՂ հարցում:
- Վերադառնանք ներքաղաքական իրավիճակին: Երեկ Հայաստանի Պառլամենտարիզմի կենտրոնը, որի ղեկավարն է Ռուբեն Թորոսյանը նամակ է ուղարկել ԵՄ, ԵԽ, ԵԱՀԿ հայաստանյան գրասենյակներին, որտեղ տեղեկացնում է ՀՀԿ-ի ապօրինությունների մասին` նշելով, որ դուք արդեն քարոզարշավ եք սկսել, բարեգործություններ եք անում: Ի՞նչ կասեք այս մասին:
- Ցանկացած քաղաքական ուժ, եթե ուզում է ռեյտինգը բարձրացնել մի երկու բան պիտի ՀՀԿ-ին ասի: ՀՀԿ-ն եւ որեւէ իշխանական կուսակցություն բարեգործություն չի անում: Իհարկե, ՀՀԿ-ն ջատագովն է, որ բարեգործություններ անեն, իսկ բարեգործություններ անում են նրանք, ովքեր ի վիճակի են: Մենք ընդամենը խրախուսում ենք բարեգործությունները:
- Դուք այսօր նաեւ կանխատեսել եք` եթե ՀԱԿ-ը լավ աշխատի, ապա առաջիկա խորհրդարանի ընտրություններում կհայտնվի ԱԺ-ում: Ի՞նչ նկատի ունեք «լավ աշխատել» ասելով:
- Դե պետք է ծրագիր ներկայացնի: Էդ ծրագիրը չկա:
- ՀԱԿ-ը բազմաթիվ ծրագրեր է ներկայացրել, թե տնտեսական, թե սոցիալական, թե առողջապահական ոլորտները բարելավելու համար եւ ներկայացրել է հասարակությանը:
- Էդպես, կարելի է Մարքսի «Կապիտալի» հատվածներ վերցնել, բազմացնել ու բաժանել: Ծրագիրը պետք է մասսայականացնի, համոզիչ ներկայացնի, ասի, թե որտեղից է այդ գումարները լինելու:
- Դուք այսօր նաեւ հայտարարել եք, թե ՀԱԿ-ը գործ անելու փոխարեն երգում է: Միաժամանակ նաեւ խոստովանել եք. որ ժամանակին իր երգը երգել է նաեւ ՀՀԿ-ն: Նկատի ունեք, որ ՀՀԿ-ն իր երգը երգել, սպառվե՞լ է, վերջացե՞լ է:
- Չէ, ՀՀԿ-ն Կարապի երգը չի երգել: Երբ ասել եմ, ՀՀԿ-ն իր երգը վաղուց է երգել, նկատի ունեմ, որ ժամանակին մենք էլ ենք ոգեւորվել, բայց հիմա իշխանության գալով, ժամանակ չունենք, միայն գործով ենք զբաղվում:
Հարցազրույցը վարեց Վիկտորյա Աբրահամյանը
