Բացել լրահոսը Փակել լրահոսը
A A
Հասարակություն

ՀՅԴ երիտասարդները անհնազանդության ակցիաները շարունակում են․ոստիկանները բերման ենթարկեցին քաղաքացիներին (տեսանյութ)

Հայ հեղափոխական դաշնակցության երիտասարդները Մաշտոցի պողոտայում այսօր կրկին անհնազանդության ակցիաներ էին իրականացնում։ Նրանց պահանջը վարչապետ Նիկոլ Փաշինյանի հրաժարականն է։

«Նիկոլ, դավաճան» վանկարկումներով նրանք շարունակեցին իրենց ակցիան, ինչին միջամտեցին ոստիկանները՝ բերման ենթարկելով անհնազանդության ակցիա իրականացնող քաղաքացիներից մի քանիսին։

ՀՅԴ Երիտասարդական միության անդամ Քրիստինե Վարդանյանը լրագրողների հետ կարճ ճեպազրույցում հայտարարեց, թե իշխանությունները կառչած են աթոռից․

«Ոստիկանները կատարում են Նիկոլ Փաշինյանի ուղիղ հրահանգը, իսկ Նիկոլ Փաշինյանի կողմից հրահանգված է իր աթոռի համար վտանգ ներկայացնող ցանկացած մեկի հնարավորինս շուտ ու ցանկացած մեթոդներով վնասազերծել»։

Վարդանյանը լրագրողներին հայտնեց՝ տեղեկատվություն ունեն, որ միայն Նորքի բաժանմունք 23 մարդ է բերման ենթարկվել, նա կարծում է, որ այսօր բերման ենթարկվողների թիվը կգերազանցի մի քանի տասնյակը։

ՀՅԴ-ականները քայլերթով ու վանկարկումներով  հասան  Կառավարության շենք, որտեղ ՀՅԴ ԵՄ անդամ Տարոն Մանուկյանը հայտարարեց, որ իրենց հաջողվել է դուրս գալ ոստիկանական մեքենայից․

«Ոստիկականական մեքենայից փախել եմ, ոստիկանները իրենց ծառայությունն են իրականացնում, շատ ոստիկաններ ստիպված են կատարել որոշակի պահանջներ»,-նշեց Մանուկյանը։

Քրիստինե Վարդանյանն էլ հավելեց՝ իրենց ակցիաները շարունակվելու են այնքան ժամանակ մինչև կառավարությունը հրաժարական չտա։

 

 
English