«Մենք Աթեշյանին չենք համարում մեր հոգևոր առաջնորդը». Թուրքիայի հայ համայնք (տեսանյութ)
ԱԺ արտահերթ նիստում այսօր ԲՀԿ խմբակցության ղեկավար Նաիրա Զոհրաբյանը վարման կարգով հայտարարեց, որ Թուրքիայի հայ համայնքը պաշտոնական նամակով դիմել է իրեն. «Նրանք Հայաստանի պատկան մարմիններին կոչ են անում զերծ պահել Արամ Աթեշյանին Գերագույն հոգևոր խորհրդի նիստերին մասնակցելուց»: Այնուհետեւ նա ընթերցեց նամակը. «Մենք՝ որպես արևմտահայ քաղաքացիներ, ձեր միջոցով դիմում ենք Հայաստանի Հանրապետության պատկան մարմիններին և Մայր Աթոռ Էջմիածնի պատասխանատուներին, որպեսզի այլևս զերծ ձգեն Արամ Աթեշյանի մասնակցությունը Գերագույն հոգևոր խորհրդի նիստերին, ով հակահայ հայտարարություններով Թուրքիո հայության և արևմտահայության արժանապատվությունը վարկաբեկելով, թուրքական կառավարության քարոզչամեքենայի գործիքն է դարձել: Բողոքում ենք Աթեշյանի Հայաստան այցը, իրեն հորդորում ենք զերծ մնալ քաղաքականց ցանկացած հայտարարություն անել և այլևս ոտք չդնել Մայր Աթոռ Սուրբ Էջմիածնի սրբազան տարածք: Մենք՝ ներքոստորագրյալներս, Աթեշյանին չենք համարում մեր հոգևոր առաջնորդ, նույնիսկ մեր սուրբ եկեղեցու սրբազնության արժանի հոգևորական, քանի որ ինքն ընտրված չէ մեր ժողովրդի քվեներով և պաշտպանում է թուրքական պետության շահերը»: ԱԺ նախագահ Գալուստ Սահակյանը, արձագանքելով նամակին, նշեց, որ դա առանձին քննարկելու հարց է և ընդհանրապես կապ չունի ԱԺ արտահերթ նիստի օրակարգի հետ: