A
A
Օրլանդոյի զինյալը երդում է տվել «Դաեշ» ահաբեկչական խմբավորմանը (տեսանյութ)
Ամերիկայի Ձայն
Միացյալ Նահանգները ցնցված է Օրլանդո քաղաքի համասեռականների “Փալս” գիշերային ակումբում հիսուն մարդու կյանք խլած զինված հարձակումից: Ահաբեկչությունից քիչ անց «Դաեշ» ահաբեկչական խմբավորումը իր լրատվամիջոցների միջոցով հայտարարել է, որ հարձակման համար իրենք են պատասխանատու:
ԱՄՆ-ի Ֆլորիդա նահանգի Օրլանդո քաղաքի համասեռականների “Փալս” գիշերային ակումբում, զանգվածային սպանություն իրականացնողը աֆղանական ծագումով Ամերիկայի քաղաքացի Օմար Մաթինն էր: Նա 2006 թվականին կրթություն է ստացել քրեական արդարադատության տեխնոլոգիաների բնագավառում, այնուհետև՝ աշխատանքի անցել անվտանգության հեղինակավոր «G4S» ընկերությունում: 2009 թվականին Մաթինը ամուսնացել է ուզբեկուհի Սիտորա Յուսուֆիի հետ: Նրա կնոջ խոսքերով, ամուսնությունից քիչ անց նա սկսել է բռնություն կիրառել իր հանդեպ, թույլատրել է գնալ միայն աշխատանքի և վերցրել է ողջ աշխատավարձը: Սիտորայի խոսքերով, ամուսինը նույնիսկ արթնանում էր գիշերները և հարվածում իրեն: 2011 թվականին նրանք ամուսնալուծվել են, այնուհետև Մաթինի գործընկերները տեղեկացրել են ոստիկանությանը նրա որոշ կասկածելի արտահայտությունների վերաբերյալ: Հետաքննությունների դաշնային բյուրոն երկու անգամ հարցաքննել է Մաթինին, սակայն կասկածելի ոչինչ չի գտել: