Վոլոդյա Ավետիսյանը դադարեցրել է հացադուլը
7 օր շարունակ հացադուլի մեջ գտնվող պահեստազորի գնդապետ Վոլոդյա Ավետիսյանն այսօր դադարեցրել է իր հացադուլը: Ինչպես «Ա1+»-ին հայտնեց «Ի պաշտպանություն Վոլոդյա Ավետիսյանի» հանձնախմբի համակարգող Գագիկ Սարուխանյանը, այսօր «Վարդաշեն» ՔԿՀ-ում նրան է այցելել Արդարադատության նախարարության ներկայացուցիչը եւ տեղեկացրել, որ պայմանական վաղաժամկետ ազատ արձակվելու վերաբերյալ բարձրացված հարցերը ուղղման պրոցեսի մեջ են: Վոլոդյա Ավետիսյանը, ով գտնվում է ՀՀ ԱՆ «Վարդաշեն» ՔԿՀ-ում, իր եւ մյուս ազատազրկված անձանց կողմից բաց նամակ էր հղել՝ ուղղված ՀՀ գլխավոր դատախազ Գեւորգ Կոստանյանին, ՀՀ արդարադատության նախարար Արփինե Հովհաննիսյանին, ՀՀ Մարդու իրավունքների պաշտպան Արման Թաթոյանին, ՀՀ ԱԺ մի շարք պատգամավորներին և ՀՔԱ Վանաձորի գրասենյակի նախագահ Արթուր Սաքունցին: Բաց նամակով նրանք դժգոհություն էին հայտնել, որ, ի թիվս այլ իրավունքների, իրենք զրկված են նաեւ պայմանական վաղաժամկետ ազատ արձակվելու եւ բաց ռեժիմին անցնելու իրավունքներից: Նրանք պահանջել էին, որ օրենսդրությանը համապատասխան՝ միջոցներ ձեռնարկվեն իրենց իրավունքները վերականգնելու ուղղությամբ: Հիշեցնենք, որ Վոլոդյա Ավետիսյանը մեղավոր է ճանաչվել խարդախություն կատարելու համար եւ դատապարտվել վեց տարվա ազատազրկման: Նա իրեն մեղավոր չի ճանաչում առաջադրված մեղադրանքում եւ համարում է քաղաքական հաշվեհարդար: