Գնդապետը ճանապարհների վիճակից չի բողոքում
ԱԻՆ ճգնաժամային կառավարման կենտրոնի պետ, գնդապետ Հովհաննես Խանգելդյանն այսօր լրագրողների հետ հանդիպմանը չցանկացավ մասնագիտական գնահատական տալ ձյան տեղումներից հետո մայրաքաղաքում ավտոճանապարհներին ստեղծված վիճակին. «Ես ի պաշտոնե չունեմ այդ իրավունքը, բայց ես էլ եմ վարորդ եմ, երթևեկում եմ ու բողոքներ չունեմ որպես Երևանի բնակիչ»,-նշեց նա։
Փոխարենը պարոն Խանգելդյանը տեղեկացրեց, որ ԱԻՆ-ը պատրաստ է դիմագրավել ձմեռվա մարտահրավերներին. «Մենք դեռ աշնան սկզբին էինք զինվել անհրաժեշտ տեխնիկական միջոցներով ու պարագաններով»: Նա ուրախությամբ նկատեց, որ արտակարգ իրավիճակների թվի նվազում է նկատվում։ Վիճակագրությունը ցույց է տալիս, որ 2010-2012 թվականների հետ համեմատած՝ արտակարգ իրավիճակների նվազման միտում կա, բայց աճել է 911 զանգահարողների թիվը. «Փառք Աստծո, զանգերը հիմնականում կենցաղային բնույթի խնդիրների հետ են կապված»:
