Ռյուտեն եվրոպացիներին կոչ է արել ավելացնել ռազմական ծախսերը և չանհանգստանալ Գրենլանդիայի համար

ՆԱՏՕ-ի գլխավոր քարտուղար Մարկ Ռյուտեն Եվրոպայի երկրներին կոչ է արել կենտրոնանալ ռազմական ծախսերի և իրենց բանակների մեծացման վրա, ինչպես նաև չանհանգստանալ Գրենլանդիայի և այլ երկարաժամկետ հետևանքների համար: Այս մասին նա ասել է Bloomberg TV-ին տված հարցազրույցում:

Պատասխանելով Գրենլանդիայի շուրջ ՆԱՏՕ-ում պառակտման մասին հարցին՝ Ռյուտեն հայտարարել է. «Ես կասեմ եվրոպացի գործընկերներին հետևյալը՝ զբաղվեք Հաագայի համաձայնագրի (խմբ.՝ ՆԱՏՕ-ի երկրների ռազմական ծախսերը ՀՆԱ-ի 2%-ից մինչև 5% ավելացնելու մասին) իրականացմամբ: Ընդլայնեք ռազմական արտադրությունը, հաստատեք պաշտպանական բյուջեները, ավելացրեք համազգեստով մարդկանց թիվը՝ սա է գլխավորը: Գերմանիան առաջատարն է այս հարցում. այն 2029 թվականին տարեկան 90 միլիարդ եվրոյով ավելի շատ կծախսի, քան 2021 թվականին՝ ամենուրեք ստեղծելով ռազմական գործարաններ: Միաժամանակ, ԱՄՆ-ի հետ համեմատությամբ եվրոպական ռազմարդյունաբերական բազան մնում է շատ փոքր, և մենք պետք է խթանենք այն»:

Ռյուտեն եվրոպացի գործընկերներին կոչ է արել կենտրոնանալ Ուկրաինային աջակցության վրա՝ որպես «Ռուսաստանից պաշտպանվելու» միջոցի, և «չանհանգսանալ երկարաժամկետ հետևանքների, այդ թվում՝ Գրենլանդիայի» համար: