«Ռենկո»-ն կմասնակցի Անգլիական այգու վերակառուցմանը
Աջակցիր «Ա1+»-ինԵրևանի քաղաքապետ Տիգրան Ավինյանն ընդունել է իտալական «Ռենկո» ընկերության գլխավոր գործադիր տնօրեն Ջովաննի Ռուբինիի գլխավորած պատվիրակությանը: Կողմերը քննարկել են համատեղ ծրագրերի ընթացքն ու երկուստեք հետաքրքրություն ներկայացնող մի շարք հարցեր: Երևանում մեկնարկող քաղաքաշինական խոշոր ծրագրին զուգահեռ՝ «Ռենկո»-ն ստանձնել է նաև Անգլիական այգու վերակառուցումը:
Քաղաքային զարգացման համատեքստում կարևորելով ներդրումային ծրագրերի նշանակությունը՝ քաղաքապետ Ավինյանը նշել է, որ համատեղ իրականացված ծրագրերը լավ հիմք են նոր նախագծերի համար, և համոզմունք է հայտնել, որ դրանք ևս հաջողելու են:
«Քաղաքի զարգացման համար ներդրումային ծրագրերը չափազանց կարևոր են, քանի որ դրանք կարող են զգալիորեն բարելավել ինչպես քաղաքային ենթակառուցվածքները, այնպես էլ բնակիչների կյանքի որակը։ Անգլիական այգին առանցքային նշանակություն ունի Երևանի համար, և այս նախագծի կյանքի կոչման հարցում մենք ունենք սեփականության զգացում»,- նշել է Տիգրան Ավինյանն ու ընդգծել, որ Երևանի քաղաքապետարանն իր լիազորությունների շրջանակում կանգնած է կարևոր այս նախագծի կողքին:
Շնորհակալություն հայտնելով մշտական աջակցության ու պատրաստակամության համար՝ «Ռենկո» ընկերության գլխավոր գործադիր տնօրենն իր հերթին նշել է, որ իրենց համար ևս մեծ պատասխանատվություն է Երևանում կարևոր նախագծերի իրականացումը:
«Մենք մեծ հավատ ունենք Հայաստանի, Երևանի նկատմամբ, ինչն էլ հիմք է շարունակական ներդրումների»,- նշել է Ջովաննի Ռուբինին:
