A
A
ՀՀ փաստաբանների պալատի նախագահ Սիմոն Բաբայանը ուղերձ է հղել փաստաբաններին
Աջակցիր «Ա1+»-ինՀՀ փաստաբանների պալատի նախագահ Սիմոն Բաբայանը ուղերձ է հղել փաստաբաններին, որը ներկայացնում ենք ստորև․
«Հարգելի՛ փաստաբաններ,
Խորին շնորհակալություն եմ հայտնում ի պաշտպանություն փաստաբանական ինստիտուտի ծավալած միասնական, նպատակաուղղված և համակարգված գործողություններին ակտիվ մասնակցության համար:
Յուրաքանչյուրս մեր կողմից իրականացվող գործառույթներում, ի թիվս այլնի, առաջնահերթ ենք համարում մարդասիրությունը, արդարությունը և մարդու իրավունքների պաշտպանության գործում նշված գաղափարների իրագործման հետևողականությունը:
Մեզ՝ փաստաբաններիս, որպես մեկ միասնական ընտանիքի, հատուկ է արժանապատվության բարձր զգացումը, քանի որ հնարավոր չէ արժանապատիվ պաշտպանել այլոց իրավունքներն առանց այդ զգացման կրողը լինելու:
Ձեր ցուցաբերած պատրաստակամությունը և գործողությունները վերահաստատեցին փաստաբանական համայնքի ուժեղ և միասնական, վճռական և աներկբա լինելու փաստը:
Նկատի ունենալով, որ առաջադրված պահանջները դեռևս չեն կատարվել, առաջիկա օրերին կիրականացվեն թիրախային միջոցառումներ, կհրավիրվի ակումբի նիստ որտեղ կամփոփվեն իրականացված ակցիաների արդյունքները և կհայտարարվի ձեռնարկվելիք հետագա քայլերի և գործողությունների ուղին:
Հ.Գ. Իրավական պետությունում պետք է գործնականում հաստատվի այն ճշմարտությունը, որ մարդու իրավունքները բարձրագույն արժեք են, և յուրաքանչյուրն իրավազոր է պետությունից պահանջելու` վերականգնել և պաշտպանել իր ոտնահարված իրավունքները», ասվում է ուղերձում:
Հիշեցնենք, որ փաստաբանները հունիսի 26-ին, մեկօրյա գործադուլ էին հայտարարել՝ իրենց բողոքի ձայնը բարձրացնելու համար փաստաբանների նկատմամբ ոստիկանների կողմից կիրառված բռնությունների դեպքերին:
