Հայաստանի ձյուդոյիստները ճամբար-հավաք են անցկացնում Ավստրիայում
Աջակցիր «Ա1+»-ինԵվրոպայի ձյուդոյի միության նախաձեռնությամբ Ավստրիայի բարձրլեռնային Միտերսիլ առողջարանային քաղաքում հունվարի 8-16-ը անցկացվում է ուսումնամարզական ճամբար-հավաք, որին մասնակցում են Հին աշխարհամասի ավելի քան 400 ձյուդոյիստ։
Ինչպես տեղեկացնում է ՀԱՕԿ-ի կայքը, հավաքին ընդգրկված են նաև Հայաստանի հավաքականի գլխավոր մարզիչ Հովհաննես Դավթյանը, մարզիկներ Ֆերդինանդ Կարապետյանը, Արսեն Ավետիսյանը, Ստյոպա Դարբինյանը, Արտյոմ Ղալաչյանը, Գոռ Կարապետյանը և Արտակ Թորոսյանը: Նրանք մասնակցում են սեմինար խորհրդակցություններին, անցկացնում պարապմունքներ, շփվում նաև մրցավարների և լրագրողների հետ:
«Դեպի ոսկի» անվանումով ճամբարի ավարտից հետո մեր ձյուդոյիստները մարզումները կշարունակեն հայրենիքում: Նախատեսված է փետրվարի 11-ին մասնակցել Բուլղարիայում մեկնարկող Եվրոպայի բաց մրցաշարին:
