Բացել լրահոսը Փակել լրահոսը
HL6A7710
A A
Մշակույթ Պաշտոնական Հասարակություն

Իտալիայի դեսպանն առաջարկել է Հայաստանում և Իտալիայում իրականացնել ցուցադրություններ

ՀՀ կրթության, գիտության, մշակույթի և սպորտի նախարարի տեղակալ Ալֆրեդ Քոչարյանն ընդունել է ՀՀ- ում Իտալիայի արտակարգ և լիազոր դեսպան Ալֆոնսո Դի Ռիզոյին։

ԿԳՄՍ նախարարության տեղեկացմամբ՝ հանդիպմանը ներկա են եղել նաև ԿԳՄՍՆ արտաքին կապերի և սփյուռքի վարչության պետ Արկադի Պապոյանը, մշակութային ժառանգության և ժողովրդական արհեստների վարչության պետ Աստղիկ Մարաբյանը, փոխդեսպան Աննառոզա Կոլանջելոն և դեսպանության աշխատակից Արամ Մկրյանը:

Հանդիպման ընթացքում անդրադարձ է կատարվել հայ-իտալական մշակութային ժառանգության ոլորտում կյանքի կոչված ծրագրերին, ինչպես նաև քննարկվել են համատեղ իրականացվող նոր ծրագրերին վերաբերող մանրամասներ՝ մասնավորապես դիտարկելով 3 հիմնական ուղղություններ: Քննարկման առանցքում առանձնահատուկ կարևորվել է իտալական արշավախմբերի և կազմակերպությունների ներգրավվածությունը՝ Հայաստանում հնագիտական ժառանգության ուսումնասիրման ոլորտում:

Իտալական կողմից հաստատվել է «ՌՕՔԵՄՓ Հայաստան. մշակութային ժառանգության պահպանության, կառավարման և արժևորման տարածաշրջանային կենտրոնի» ծրագրի երկրորդ փուլի ֆինանսավորման տրամադրումը, որին առնչվող ծրագրերը երկուստեք մանրամասն կքննարկվեն առաջիկայում: Այնուհետև կողմերն արծարծել են հայ-իտալական մշակութային հարաբերությունների խորացմանն ու ընդլայնմանն ուղղված ծրագրերը՝ տարբեր ուղղություններով:

Այդ համատեքստում դեսպան Ալֆոնսո Դի Ռիզոն առաջարկել է Հայաստանում և Իտալիայում իրականացնել ցուցադրություններ՝ «Հետք» խորագրով՝ ներկայացնելով իտալական մշակույթի հետքերը Հայաստանում, և հայկական մշակութային հետքերը՝ Իտալիայում: Դեսպանի խոսքով այդ նախագիծը լավագույնս կարտացոլի դարավոր պատմություն ունեցող երկու երկրների մշակույթների առնչությունները:

Նախարարի տեղակալը գոհունակությամբ է ընդունել դեսպանի առաջարկը և պատրաստակամություն հայտնել մանրամասն մշակելու բոլոր այն ծրագրերը, որոնք երկուստեք նախանշվել և քննարկվել են: Հանդիպման ընթացքում կողմերն անդրադարձել են նաև երկուստեք հետաքրքրություն ներկայացնող այլ հարցերի: