Մենք հրապուրիչ գործընկեր ենք՝ ինչպես առևտրի, այնպես էլ ներդրումային առումով. Վրաստանի փոխվարչապետ (տեսանյութ)
Աջակցիր «Ա1+»-ինՀայաստանի և Վրաստանի միջև առևտրատնտեսական համագործակցության միջկառավարական հանձնաժողովի 10-րդ նիստին բացման խոսքով հանդես եկավ նաև Վրաստանի փոխվարչապետ, տարածքային զարգացման և ենթակառուցվածքների նախարար Մայա Ցկիտիշվիլին:
Նա Հայաստանի պատվիրակությանը շնորհակալություն հայտնեց ջերմ ընդունելության համար և ընդգծեց, որ այս հանդիպումը Վրաստանի և Հայաստանի համար մեծ նշանակություն ունի:
«Անչափ կարևոր է տնտեսության բնագավառում մեր հարաբերությունների զարգացումը, որը հնարավորություն է տալիս մեր համագործակցությունը ավելի խորացնել: Մեզ համար ուրախալի էր պարոն Փաշինյանի հայտարարությունը, որ Երևանը կակտիվացնի աշխատանքը Եվրամիության հետ հարաբերություններում՝ կապված առանց անցագրային կարգի հետ: Մենք ցանկացած հարցում խորհրդատվության ցուցաբերության պատրաստակամություն ենք հայտնում»,- ասաց Մայա Ցկիտիշվիլին:
Վրաստանի փոխվարչապետի խոսքով՝ Վրաստանի և Հայաստանի միջև տնտեսական կապերը կարող են խորանալ: Վրաստանում բիզնեսով զբաղվելու համար, ըստ Մայա Ցկիտիշվիլիի, կան բոլոր նախադրյալները:
«Մենք հետաքրքիր և հրապուրիչ գործընկեր ենք՝ ինչպես առևտրի, այնպես էլ ներդրումային առումով: Մեզ մոտ թափանցիկ բիզնես միջավայր է, շատ ցածր են հարկերը, և կոռուպցիա չկա: Գործընկեր ենք բազմաթիվ արտասահմանյան երկրների հետ, չունենք սահմանափակումներ՝ արտարժույթի առումով»,- շեշտեց Վրաստանի փոխվարչապետը:
Վաղը՝ հունիսի 28-ին, Դիլիջանում տեղի կունենա հայ-վրացական, վրաց-հայկական բիզնես ֆորում, որին կմասնակցեն Հայաստանի և Վրաստանի փոխվարչապետերը:
