Նազենի Ղարիբյանին լսելով հասկանում ես ինչքան անտեղյակ է ամեն ինչից .Նիկոլայ Ծատուրյան (տեսանյութ)
Երեկ տեղի ունեցավ հանդիպում մշակույթի նախարարի պաշտոնակատար Նազենի Ղարիբյանի և արվեստի գործիչների միջև: Տիկնիկային թատրոնի գեղարվեստական տնօրեն Ռուբեն Բաբայանը շատ դրական է գնահատում հանդիպումը, քանի որ խնդիրները պետք է միասին քննարկել և հասկանալ լուծման ճանապարհները: Նա նշեց, որ հնարավոր է հարցը փակվի, բայց դա չի նշանակում, որ խնդիրը լուծված է, քանի որ այս ոլորտում արդեն երեսուն տարի է բարեփոխումներ չեն արվում: «Երեկ նախարարին և փոխնախարարներին 13 էջանոց փաստաթուղթ հանձնեցի, որտեղ ներառված է եվրոպական երկրներում մշակույթի ֆինանսավորման օրինակներ: Պետությունը գումար չունի և փորձում է կրճատել թատրոնները, բայց չի ուզում միաժամանակ թատրոնի համար բացել սնուցման աղբյուրներ: Ամբողջ աշխարհում չկա զարգացած երկիր, որ հույսը դնի միայն պետական բյուջեի վրա»: Ռուբեն Բաբայանին մտահոգում է, այն հանգամանքը, որ փաստաթուղթը պատրաստվել է գաղտնի ձևով. «Գաղտնի պատրաստվում են այն փաստաթղթերը, որոնց մասին չպետք է իմանա հակառակորդը, իսկ ո՞վ է հակառակորդը, մե՞նք»: Ռեժիսոր Նիկոլայ Ծատուրյանը նշում է, որ տարիներ առաջ դիմել է մշակույթի նախկին նախարար Հասմիկ Պողոսյանին առաջարկելով թատրոնների ֆինանսավորման համար համակարգ ստեղծել, որը կֆինանսավորվի հայ ձեռներեցների շահույթից, սակայն գործին ընթացք չի տրվել: «Նազենի Ղարիբյանին լսելով հասկանում ես ինչքան անտեղյակ է ամեն ինչից: Ասում է՝ համազգային թատրոնը ունի քաղաքական ուղղվածություն և հայրենասիրական ներկայացումներ են բեմադրում: Ես ապշեցի, էլ ո՞նց հարգեմ ես այդ կնոջը: Համազգային թատրոնը նոր շունչ է ստանում Արման Նավասարդյանն էլ դարձել է տնօրեն ,Նարինե Գրիգորյանը հիանալի բեմադրիչ է և հիմա ուզում են թատրոնը փակել»:
