Սա ամենեւին կոնսենսուս չէ. Արամ Մանուկյան (տեսանյութ)
Հանուն բարեփոխված ընտրական օրենսգրքի՝ քաղաքական տարբեր ճակատների ներկայացուցիչների երեկ ձեռք բերված համաձայնությունը դեռեւս չի նշանակում, որ ընդդիմության բոլոր առաջարկներն ընդունվել են. «Սա ամենեւին կոնսենսուս չէ, սա չի ապահովում արդար ընտրություններ»,-ասում է ՀԱԿ պատգամավոր Արամ Մանուկյանը: Իշխանության ներկայացուցիչը համաձայն չէ՝ այն 5 հարցերը, որոնք առանձնացվել էին ու կարեւորվել՝ գտել են իրենց լուծումները. «Մենք եւ դուք ընտրել ենք հինգ հարց, ասել ենք, եթե այս հինգը լուծենք, արդեն երաշխավորում ենք վստահելի ընտրություններ»,- նշում է ՀՀԿ պատգամավոր Հովհաննես Մարգարյանը: Նախկինում իշխանության հետ կոալիցիա կազմած ուժերն ավելի չեզոք են: Նրանք համաձայնագիրը առաջխաղացում են համարում, բայց ոչ վերջնական լուծում: «Հայաստանն այդ երկիրը չի, որ լիքը պրոբլեմների մեջ, մեկ էլ ընտրական օրենսգիրքը դառնա իդեալական, բայց գոնե մի բան առաջ է գնացել»,-նշում է ԲՀԿ պատգամավոր Միքայել Մելքումյանը: Իսկ ՕԵԿ պատգամավոր Հովհաննես Մարգարյանը հավելում է. «Մենք որդեգրել ենք կառուցողական մոտեցում, մենք ամեն ինչ արեցինք, որպեսզի չվիժեցնենք այս գործընթացը»: Կնքված համաձայնագիրը ոչ բոլորի սրտով է, ասում է Արամ Մանուկյանը, բայց անուններ հրաժարվում է ասել: Միայն նշում է, որ այսօրվանից պետք է բոլոր կողմերը մտածեն փաստաթղթի իրագործման ֆինանսավորման մասին: 4+4+4 ձեւաչափը ներառում է իշխանության, ընդդիմության ու քաղաքացիական սեկտորները: Հասարակական կազմակերպությունների ներկայացուցիչները հրաժարվել են ստորագրել փաստաթղթի տակ՝ համարելով, որ ընտրական օրենսգրքում բազմաթիվ չկարգավորված խնդիրներ կան, Իսկ 5 կետերով փոփոխությունները օրենսգրքում կկատարվեն հունիս ամսվա վերջում,երբ ԱԺ-ը կհրավիրի արտահերթ նիստ: