«Պուտինը փոխգործակցում է սուբյեկտի հետ. Սարգսյանը բավարար սուբյեկտ չէ»
Մի քանի օրով հայրենիքում գտնվող ռուսաստանաբնակ քաղաքագետ Կարինե Գևորգյանը Հայաստանի ներքաղաքական կյանքից շատ տեղյակ չէ: Սակայն հետևելով երկու երկրների բարձրագույն ղեկավարությունների քայլերին, հանդիպումներին, նա արել է որոշակի եզրակացություն: «Փոխգործակցել կարելի է ուժեղ սուբյեկտի հետ: Եվրոպացի քաղաքական գործիչների մեծ մասը սուբյեկտ չեն: Իսկ Պուտինը սուբյեկտ է, նա ունի կամք, դա փաստ է: Նա կարող է փոխգործակցել սուբյեկտի հետ: Իսկ քանի որ նա սուբյեկտ է, նրա բնավորությունը որոշակիորեն արտացոլվում է իր վարած քաղաքականության վրա: Նկատեք՝ քանի անգամ է նա կրկնել դանակով թիկունքից խփել արտահայտությունը: Նա չի կարող դա ընդունել ու ներել երբեք: Պուտինը գործում է այն ժամանակ, երբ պետք է: Այստեղ՝ Հայաստանում նա չունի սուբյեկտ, նրա հետ հարաբերությունները ձևավորված չեն»: «Ա1+»-ի ճշտմանն ի պատասխան նա նորից հաստատեց. «Սերժ Սարգսյանը բավավար սուբյեկտ չէ: Ես շատ հարցերից տեղյակ չեմ: Բայց կարծում եմ՝ նա չի ձևավորել այդ հարաբերությունները և Պուտինի հետ տետ ա տետ չի ասել և ցույց չի տվել՝ ահա սրանք են ձեր շահերը, և մենք մինչև այս աստիճան ենք այդ շահերը պահելու»: