Պեդրո Ագրամունտը` ԼՂ հակամարտության մասին
ԵԽԽՎ նախագահ Պեդրո Ագրամունտն այսօր հանդիպել է Վեհաժողովի աշխատանքները լուսաբանող լրագրողների հետ: Այս մասին հայտնում է «Ա1+»-ի թղթակիցը Ստրասբուրգից։ Ագրամունտը, ամփոփելով Վեհաժողովի աշխատանքը, նշել է, որ սառեցված հակամարտությունները դանդաղորեն բորբոքվում են` վտանգելով ԵԽ անդամների եւ ամբողջ Եվրոպայի անվտանգությունը եւ կայունությունը : Վերջին լարվածությունը ցույց տվեց, որ հակամարտությունը արագորեն կարող է վերածվել լայնամասշտաբ պատերազմի : «Մենք չենք կարող դա ընդունել, եւ որպես խորհրդարանականներ մեր պարտականությունն է թուլացնել լարվածությունը, օգնել կողմերին խոսել միմյանց հետ` վերականգնելու վստահությունը, նաեւ կողմերին օգնել նստել բանակցությունների սեղանի շուրջ»,- ասել է նա : ԵԽԽՎ նախագահը հիշեցրել է, որ այս շաբաթ առանձին հանդիպումներ է ունեցել Հայաստանին եւ Ադրբեջանի պատվիրակությունների ղեկավարների հետ. «Կոչ եմ արել ձեռնպահ մնալ կոշտ հռետորաբանությունից, որը միայն սրում է լարվածությունը : Թեեւ նրանց դիրքորոշումները չեն համընկնում, մենք չպետք է դադարեցնենք մեր ջանքերը, երկխոսությունը մեր միակ գործիքն է»։ Նա հույս է հայտնել, որ հաջորդ նստաշրջանին կհաջողվի թուլացնել բանավեճերի լարվածությունը: Պեդրո Ագրամունտը պատասխանել նաեւ ԼՂ հարցում իր դիրքորոշման վերաբերյալ հարցերին: Հանդիպման այդ հատվածը, սակայն, լուսաբանման ենթակա չէր:
