«Չեմ կարող գալ, գրկել ու տանել Ձեզ դուրս». Շարմազանովը՝ Փոստանջյանին
ԱԺ արտահերթ նիստում, երբ քննարկվում էր ՀՀ նաեւ ցամաքային կետերում անմաքս տարածքներ բացելու հարցը, «Ժառանգության» պատգամավոր Զարուհի Փոստանջյանը մոտեցավ ամբիոնին՝ ելույթի համար: Տեղի ունեցավ մեծ վիճաբանություն: Ըստ պատգամավորի՝ այս նախագիծը փոքր մի դրվագ է մեր հանրային կյանքում, եւ նախընտրեց անդրադառնալ կառավարության անցած տարվա գործունեությանը, որ կողմ եղավ ԵՏՄ անդամակցությանը. «Միակ ելքը այս իրավիճակում Սերժ Սարգսյանի ու նրա իշխանության հեռացումն է: Մենք պետք է ունենանք հստակ քայլեր, միասնական իրականացված քայլեր, մենք պետք է ցույց տանք նրանց նկատմամբ մեր անհնազանդությունը, մասնավորապես՝ հարկեր չմուծելով, որոնք մեր վզին փաթաթված են ու արդար չեն: Գործող ռեժիմը գործում է ԱԱԾ եւ ոստիկանության հետ միասին եւ որպեսզի նրանք այլեւ չգոյատեւեն, մենք պետք է նրանց զրկենք ֆինանսավորումից: Սիրելի հայրենակիցներ, եկող տարի ձեր աշխատավարձերը նվազելու են, իսկ գները՝ աճելու: Սա իշխանությունների ապաշնորհ եւ հանցավոր գործունեության արդյունքն է...»: ԱԺ փոխնախագահ Էդուարդ Շարմազանովը դիտողություն արեց նրան՝ ասելով, թե ըստ էության խոսի, այլապես կանջատի նրա խոսափողը: «Դուք Գալուստ Սահակյանը չեք, դուք խախտում եք Կանոնակարգ օրենքը»,- արձագանքեց Զարուհի Փոստանջյանը: «Ես Էդուարդ Շարմազանովն եմ, եւ ես ձեզ հետ բանավիճելու ցանկություն չունեմ, տիկին: Սա խեղկատակություն է... Իրար պետք է հարգենք... Եթե ձեր տանը սովոր եք այդպես... Խոսքի ազատությունը մի բան է, ամենաթողությունը՝ այլ բան... Գնացեք, նստեք ձեր տեղը: Ութ րոպե խոսեցիքն, ի՞նչ ասացիք նախագծից: Պարոն Մինասյան, մոտեցեք ամբիոնին, եթե չեք գալիս, անցնում ենք այլ հարցի... Սա մանկապարտեզ չէ, տիկին Փոստանջյան»,- հայտարարում էր պարբերաբար Էդուարդ Շարմազանովը: Իսկ այդ ընթացքում Զարուհի Փոստանջյանը շարունակում էր համառորեն մնալ ամբիոնի մոտ եւ պնդել, որ միացնեն իր խոսափողը, քանի որ ինքը դեռ երեք րոպե ուներ ելույթի ունենալու համար: «Դե էստեղ մնացեք, որ մարդիկ չաշխատեն... Օգտվեք, որ գեղեցիկ սեռի ներկայացուցիչ եք, չեմ կարող գալ, գրկել ու տանել ձեզ դուրս... Մի ջենտլմեն չկա՞, որ գա ձեզ հրավիրի դուրս: Ես գիտեի՝ դուք ադեկվատ մարդ եք, սակայն ընթերցեմ՝ ինչ է ասում Կանոնակարգ օրենքը կարգազանց պատգամավորների համար... արա, էս ով ա, արա»,- Էդուարդ Շարմազանովի նյարդերը տեղի էին տալիս, սակայն նա կետ առ կետ ընթերցեց կարգազանց պատգամավորների մասին կետերը: Զարուհի Փոստանջյանն էլ կոչ արեց ընթերցել այն կետերը, թե որ դեպքում է պատգամավորը համարվում կարգազանց: Քիչ անց ԱԺ փոխնախագահը հայտարարեց երեսուն րոպե ընդմիջում: