Ահազանգ՝ ՔԿՀ-ներում ընտրախախտումների վերաբերյալ

Այսօր ահազանգ է ստացվել, որ քերակատարողական հիմնարկներում ընտրողներին ստիպում են ծրարի մեջ դնել բոլոր ինը քվեաթերթիկները և գցել քվեատուփի մեջ: Կտրոն տրամադրելու վերաբերյալ ազատազրկված անձանց պահանջին ուշադրություն չդարձնելով՝ ստիպում են ծրարն արագ գցել քվեատուփի մեջ և լքել տարածքը: Այս մասին հայտնում է «Անկախ դիտորդ» հասարակական դաշինքը։

Համաձայն ահազանգողի՝ բոլոր քրեակատարողական հիմնարկներում նույն իրավիճակն է տիրում և դա մի նպատակ է հետապնդում, որ վերջում ծրարից հանեն ՀՀԿ քվեաթերթիկը, իսկ մյուսները դեն նետեն:

Արդարադատության նախարարության քրեակատարողական հիմնարկների վարչության մամուլի պատասխանատու Գոռ Ղլեչյանն «Ա1+»-ին հայտնեց, որ իրենց նման ահազանգ չունեն: Ընտրություններն էլ իրենք չեն կազմակերպում, այլ հանձնաժողովը. «Քրեակատարողական ծառայությունն ի գիտություն պարզաբանում է, որ ընտրական հանձնաժողովների կազմավորման, դրանց գործունեության կազմակերպման, ինչպես նաև տեղամասային կենտրոններում քվեարկությունը կազմակերպելու իրավասությունը վերապահված է ՀՀ կենտրոնական ընտրական հանձնաժողովին, տարածքային ընտրական հանձնաժողովներին և տեղամասային ընտրական հանձնաժողովներին»։