Խանդոյանի ոտքը կպե՞լ է ոստիկանին, թե՞ ոչ (տեսանյութ)
Պարեկապահակային ծառայության գնդի գրավմանը հաջորդած դեպքերով կալանավորված Արարատ Խանդոյանի գործով դատավարության մասնակիցները դիտում են իրեղեն ապացույցը՝ տեսաերիզը: «Կադրում որտե՞ղ է երեւում, որ ես վահան եմ քաշում: Բայց կադրում պարզ երեւում է, որ ինձ հարվածում են: Ոստիկաններին ասում եմ՝ մարդ չեք արա, ձեր բնակիչներին ինչո՞ւ եք խփում, ինձ հարվածում են: Ես գնում եմ, այդտեղ որտեղ է երեւում, որ ես հարվածում եմ»,- հայտարարեց Արարատ Խանդոյանը: Իսկ դատախազ Հայկ Պետրոսյանն էլ ավելացրեց. «Ակնհայտ տեսնում եմ, որ հրմշտում է ոստիկաններին, ոտքով հարվածում»: Այս խոսքերը զայրացրին Արարատ Խանդոյանին. «Դուբինկայով հարվածելով կարողանում են ինչ -որ բան անել: Ես իրավունք չունեմ ասեմ, մի հարձակվեք, հո վայրենի չեք»: Նա դատարանում նաեւ հայտարարեց, որ իրեն կալանավորելը նախապես պլանավորված է եղել, քանի որ ոստիկանները մինչ դեպքը գնացել են իրենց տուն: Արարատ Խանդոյանը «Սասնա ծռեր» խմբի անդամ Արայիկ Խանդոյանի՝ «Միայնակ գայլ»-ի եղբայրն է. «Եթե ի սկզբանե դա պետական պատվեր չէր, ապա ինչի համար էր ոստիկանությունը հետաքրքրված ինձնով»: Այսօրվա դատական նիստում դատավոր Մնացական Մարտիրոսյանը բավարարեց պաշտպանական կողմի միջնորդությունը եւ վերացրեց Արարատ Խանդոյանի տեսակցությունների եւ հեռախոսային զանգերի վրա դրված արգելանքը: Դատական նիստը կշարունակվի մարտի 30-ին