Ազատամարտիկը կալանավայրում կաթված է ստացել (տեսանյութ)
2015թ Նորք-Մարաշում բացահայտված Հանցավոր համագործակցության գործով ամբաստանյալ, Ապար անունով հայտնի Էդուարդ Ներսիսյանի առողջական վիճակը ծանր է մնում՝ 7 ամիս առաջ կալանավայրում ստացած կաթվածից հետո։ «Աջակողմյան թուլացում ունի, երկրորդ խմբի հաշմանդամ ազատամարտիկ է եւ առողջական վիճակը քանի գնում վատթարանում է»,- «Ա1+»-ին ասաց պաշտպան Կարմեն Պողոսյանը: Այս գործով դատական նիստերը պարբերաբար հետաձգվում են ։ Պաշտպանը պատրաստվում է միջնորդել՝ նրա մասով գործն առանձնացնելու համար։ «Եթե այսքան երկար ժամանակով ընդմիջվի դատական պրոցեսը եւ չբացվի, կունենանք, նոր Շիրխանյան, ավելի վատ վիճակով: Նա տեղաշարժման լուրջ խնդիրներ ունի եւ բուժումը դեռ ընթացքի մեջ է»: Այսօր էլ ՝արդեն վեցերորդ անգամ Կենտրոն եւ Նորք-Մարաշ վարչական շրջանների ընդհանուր իրավասության դատարանում չսկսված այս գործով դատական նիստը հետաձգվեց։ Պաշտպաններից մի քանիսը չկային, ինչպես նաեւ ամբաստանյալ Վահան Շիրխանյանը չէր բերվել դատարան։ Շիրխանյանը պահանջում է իրեն դատարան տանել պատգարակով, ինչը չի արվում։ «Եթե կա մի կողմ, որ չի ուզում Վահան Շիրխանյանը հայտնվի այստեղ, դա պետական մարմիններն են»,- ավելացրեց նրա պաշտպան Հայկ Ալումյանը: Գործով դատական նիստը կշարունակվի մարտի 17-ին:
