Գեւորգ Սաֆարյանն այսօր առարկեց դատախազի գործողությունների դեմ (տեսանյութ)
«Նոր Հայաստան» հանրային փրկության ճակատի անդամ Գեւորգ Սաֆարյանին զարմացնում է իր գործով որպես վկա հարցաքննվող ոստիկանների ցուցմունքները: «Փաստացի տալիս են այսպիսի ցուցմունք, մենք տեսանք, որ Գեւորգ Սաֆարյանը խփեց Գեղամ Խաչատրյանին, մնացած ոչ մի բանը չենք հիշում: Ոչ հիշում են դրանից առաջ ինչ տեղի ունեցավ, ոչ հիշում են դրանից հետո ինչ տեղի ունեցավ»,- հայտարարեց Գեւորգ Սաֆարյանը: Այսօր դատարանում շարունակվեց Ամանորի գիշերը Ազատության հրապարակում ոստիկան Գեղամ Խաչատրյանին հարվածելու մեջ մեղադրվող Գեւորգ Սաֆարյանի գործով դատական նիստը; Դատարանում հարցաքննվում էր վկա ոստիկան Վաղինակ Մինասյանը: Նա պատմեց, որ Գեւորգ Սաֆարյանը հարվածել է ոստիկանին: Սակայն չէր հիշում, թե Գեւորգ Սաֆարյանը ինչ դիրքում էր գտնվում հարվածելիս: «Այնպիսի տպավորություն է, որ վկայի հիշողության մեջ միայն Գեւորգ Սաֆարյանի ձեռքն է, ձեռքից այն կողմ չի հիշում, ինչ է կատարվել: Վկաները տալիս են ակնհայտ սուտ եւ հորինված ցուցմունքներ, ինչով էլ պայմանավորված է իրենց չհիշելը»,- ավելացրեց նա: Գեւորգ Սաֆարյանն այսօր առարկեց նաեւ դատախազի գործողությունների դեմ՝ նշելով, որ հուշում է, թե ինչ պատասխանի վկան, այնուհետեւ առարկեց դատավոր Մնացական Մարտիրոսյանի գործողության դեմ: «Վկան չի նշում գործողությունները , անկապ պատասխաններ է տալիս եւ փոխանակ նախագահող դատավորը ստիպի, որ ըստ էության պատասխանի, նախագահող դատավորն ասում է, որ ոչինչ թող չպատասխանի»: Պաշտպան Տիգրան Հայրապետյանն էլ ավելացրեց,որ վկա Վաղինակ Մինասյանի ցուցմունքներով Գեւորգ Սաֆարյանի մեղադրանքը չհաստատվեց: Գործով դատական նիստը կշարունակվի հունիսի 30-ին:
