ԼՂ հարցը ԵԽԽՎ-ում չի քննարկվի որպես ընթացիկ հարց
Քիչ առաջ ավարտվել է ԵԽԽՎ քաղաքական բյուրոյի նիստը, որտեղ որոշվել է չքննարկել Լեռնային Ղարաբաղի հակամարտության հետ կապված ցանկացած առաջարկ որպես ընթացիյ հարց : Այդ մասին Ստրասբուրգում գտնվող «Ա1+»-ի թղթակցին տեղեկացրել է ԵԽԽՎ-ում հայկական պատվիրակության ղեկավար Հերմինե Նաղդալյանը : Հիշեցնենք, որ բյուրոյի օրակարգում ներառված էր ԼՂ թեմայով միանգամից երեք հարց : Ապրիլի 7-ին ԵԽԽՎ ֆրանսիական պատվիրակության ղեկավար Ռենե Ռոքեն ներկայացրել էր առաջարկ, որպեսզի գարնանային նստաշրջանում հրատապ անցկացվեն քննարկումներ « Լեռնային Ղարաբաղի հակամարտության վերջին եւ ողբերգական սրացումը » թեմայով: Ապրիլի 12-ին արդեն Ադրբեջանի պատվիրակությունն էր նման առաջարկ ներկայացրել` փոխելով առաջարկվող բանավեճի թեման` «Լեռնային Ղարաբաղում եւ Ադրբեջանի մյուս օկուպացված տարածքներում բռնությունների աճը » : Հայկական պատվիրակությունն իր առաջարկը ներկայացրել է ապրիլի 13-ին` քննարկումների թեման վերնագրելով «Ադրբեջանի իրականացրած պատերազմական հանցագործությունները Լեռնային Ղարաբաղի հանդեպ իրականցված ագրեսիայի ժամանակ» : Սա չի նշանակում , թե ԼՂ հակամարտության հետ կապված հարցեր չեն բարձրացվի քննարկումների ընթացքում: Հարցը կարող է բարձրացվել նաեւ ԵԽԽՎ նախագահ- Հերմինե Նաղդալյան հնարավոր հանդիպման ժամանակ: Որպես ընթացիկ հարց քննարկվելու է Պանամյան փաստաթղթերի հարցը:
