«Որ քրֆում են, ես դրանից չեմ ամաչում». Վ. Այվազյանը՝ գործընկերների մասին (տեսանյութ)
Արմավիրի մարզի Մրգաշատ գյուղում են «Այո և ոչ» ռեալիթի շոուի մասնակիցները։ «Եկել ենք ասելու, որ մենք այո ենք ասում զարգացմանը,- մրգաշատցիներին դիմելով՝ ասում է Այո-ական Կարինե Աճեմյանը, ապա հավելում.- մեր օպոնենտները շատ հարցերում առաջարկում են սպանել, գլխատել, որոշակի մարդկանց հետ ունեն խնդիրներ երևի, բայց որ մեր կյանքում շատ բան փոխվել է, ակնհայտ է»։ Մրգաշատցիները ուզում են իմանալ՝ արդեն երրորդ անգամ փոխվող սահմանադրությունից իրենց կյանքում ինչ է փոխվելու։ Ոչ-ական Հրանտ Բագրատյանի համար ի թիվս այլ հարցերի՝ անհասկանալի է, թե ինչու նոր Սահմանադրությամբ այդքան հեշտությամբ կարելի է դառնալ ՀՀ քաղաքացի. «Քաղաքացի դառնալու համար թող էս երկրի համար մի բան անեն, ծառայեն՝ նոր»։ Մրգաշատցիներից մեկի հարցին, թե Բագրատյանի օրոք ինչու չարվեց էդ ամենը, Բագրատյանը պատասխանեց. «Իմ վարչապետության օրոք եղավ առաջին տնտեսական աճը, բացվեց ատոմակայանը, տարածքներ ազատագրվեցին... 4 տարում էդքան ենք կարողացել անել, քիչ ենք արել՝ ներողություն եմ խնդրում»։ Մի ծերունի հետաքրքրվում էր. «Որ աղքատ երկիր ենք, էսքան միլիոնատեր որտեղի՞ց»։ Վարդան Այվազյանը պատասխանում է. «Բագրատյանի օրոք են ստեղծվել առաջին միլիոնատերերը, երբ մի հոգին 40 գործարան ունեցավ»։ Ապա իր մասին ասաց. «Ունեմ մի գործարանում 40 տոկոս»։ Նա հիշեցնում է ասույթը՝ շահելու համար պետք է գոնե մեկ անգամ «լատարեյ» գնել։ Բնակիչներից մեկը հարցրեց Վարդան Այվազյանին, դուք չեք ամաչո՞մ, որ էդ հեղինակությունների, թաղային տղերքի կողքին եք նստում Ազգային ժողովում։ Պատասխանը հետևյալն էր. «ՀՀԿ-ն թե լավի, թե վատի տերնա։ Որ քրֆում են, ես դրանից չեմ ամաչում»։
