Սեպտեմբերի սկզբից տաք հոսանքներ կներթափանցեն (տեսանյութ)
Ներկա պահին հանրապետության տարածքում ջերմաստիճանը նորմայից ցածր է 5-7 աստիճանով: ՏԿԱԻՆ Հիդրոմետ ծառայության Օդերևութաբանության կենտրոնի պետի տեղակալ Գագիկ Սուրենյանի խոսքով՝ ջերմաստիճանի բարձրացում ակնկալվում է հաջորդ շաբաթվանից: «Օգոստոսի 30-ից սկսած օդային հոսանքներն աստիճանաբար կսկսեն փոխել իրենց ուղղությունը: Կրկին մեր հանրապետության տարածք կներթափանցեն արևադարձային տաք հոսանքներ, և օդի ջերմաստիճանը մինչև սեպտեմբերի 2-ը աստիճանաբար կբարձրանա 3-5 աստիճանով: Այսինքն` մենք ամսվա վերջին օրերին արդեն Արարատյան դաշտում և մայրաքաղաքում կունենանք մինչ 28-30 աստիճան տաքություն»,-ասում է Սուրենյանը: Օդերևութաբանության կենտրոնի կանխատեսման համաձայն՝ սեպտեմբերի 5-ից 6-ն ընկած ժամանակահատվածում, հանրապետությունը կգտնվի արևադարձային տաք օդային հոսանքների ազդեցության գոտում, ինչի արդյունքում ջերմաստիճանն առանձին օրերին կարող է հասնել մինչև 33 աստիճանի: