Քաղաքապետարանը հաստատեց. վարձավճարների վերանայում կլինի (տեսանյութ)
Լուրերը, թե գետնանցումների տարածքների վարձավճարները կբարձրանան, վերջերս անհանգստացնում էին մանր եւ միջին ձեռնարկատերերին։ Մեր հարցումներից պարզ դարձավ, սակայն, որ վերջիններս չգիտեին՝ իրենց ինչ է սպառնում։ Քաղաքապետարաննն այս առնչությամբ մեզ գրավոր պատասխան է ներկայացրել, որը ներկայացնում ենք ստորեւ։ «Աշխատակազմի անշարժ գույքի կառավարման վարչությունից տեղեկացնում են, որ Երևան համայնքի սեփականություն հանդիսացող գետնանցումներում ֆիզիկական և իրավաբանական անձանց կողմից զբաղեցված տարածքների հաշվառման, իրավիճակի գնահատման, վարձակալության պայմանագրերով վարձակալների ստանձնած պարտավորությունների կատարման, վարձավճարի չափի վերանայման, տարածքների արդյունավետ օգտագործմանն ուղղված ուսումնասիրություններ կատարելու նպատակով 09.01.2014թ. ընդունվել է Երևանի քաղաքապետի հ.5-Ա կարգադրությունը՝ աշխատանքային խումբ ստեղծելու նպատակով։ Երևան քաղաքի ավագանու 10.12.2013թ. հ.95-Ն որոշմամբ սահմանվել է Երևանի վարչական տարածքում համայնքային սեփականություն հանդիսացող գույքի վարձակալության վարձավճարի չափը և ուսումնասիրություններ կատարելու նպատակն է, որպեսզի վարձակալության վարձավճարի չափը համապատասխանի Երևանի ավագանու վերը նշված որոշմամբ սահմանված չափանիշներին և համապատասխանի գոյություն ունեցող իրական վարձակալության վարձավճարի չափին, քանի որ առկա են դեպքեր, երբ վարձակալության վարձավճարը նախկինում, տարբեր ժամանակներում սահմանվել է տարբեր եղանակով։ Միաժամանակ հայտնում ենք, որ վարձակալության վարձավճարի վերանայման անհրաժեշտություն կարող է լինել ուսումնասիրությունների արդյունքում տվյալների ամփոփումից հետո, երբ վարձավճարի սահմանված չափը չհամապատասխանի գործող օրենսդրության չափանիշներին և չապահովի համանման դեպքում միևնույն մոտեցումը կիրառելու սկզբունքին։ Երևանի ավագանու 10.12.2013թ. հ.95-Ն որոշման համաձայն՝ սահմանվել է Երևանի վարչական տարածքում համայնքային սեփականություն հանդիսացող գույքերը վարձակալությամբ տրամադրելու դեպքում վարձավճարի չափը և այս որոշման հիման վրա համապատասխան վարչական ակտը և գործողությունները իրականացվում է Երևանի քաղաքապետի վարչական ակտով»:
