«Ես նկարում եմ հայերեն»
Այսօր Հայաստանի նկարիչների միությունում բացվեց նկարիչ Վիկտոր Հովհաննիսյանի անհատական աշխատանքների ցուցահանդեսը։
Սա արդեն նկարչի երկրորդ ցուցահանդեսն է միությունում։
Վիկտոր Հովհաննիսյանը ծնվել և մեծացել է Ջավախքում։1976-2000 թթ. աշխատել է հեռուստաընկերությունում , իսկ 2000 թվականից ի վեր զբաղվում է միայն գեղանկարչությամբ։
«Ինձ ոգեշնչում է կյանքն ու ազգայինը»,-նշում է նկարիչը։
Պարոն Հովհաննիսյանը իր ստեղծագործությունները բնութագրում է այսպես.«Ես նկարում եմ հայերեն, մտածում եմ հայերեն ու ապրում եմ հայավարի։Այլ կերպ ես չեմ կարող ստեղծագործել»։
Նկարչի կտավների հիմնական թեման մայր բնությունն է ու ազգային պատկերները։
Ցուցահանդեսում ներկայացված են նկարչի երկու տասնյակից ավելի աշխատանքներ։ Արվեստասերները դեռ մի քանի օր հնարավորություն կունենան վայելելու Վիկտոր Հովհաննիսյանի աշխատանքները։
