Քաղաքապետարանն արտոնել է
Երեւանի Քաղաքապետարանն արտոնել է «Շուշի 92 ազատամարտի եւ վետերանների միավորում» ՀԿ-ին Երեւանի Ազատության հրապարակում հունիսի 16-ին հանրահավաք անցկացնել։
Ինչպես «Ա1+»-ի հետ զրույցում նշեց ՀԿ նախագահ Իշխան Սարգսյանը, իրենք հանրահավաքի ընթացքում բարձրացնելու են միայն սոցիալական հարցեր. «Մենք կողմնակի հարցերով չենք հետաքրքրվում եւ մեզ միայն ազատամարտիկների սոցիալական հարցերն են հուզում»,- նշեց նա։
Հանրահավաքին ազատամարտիկները որեւէ մեկին անհատական հրավեր չեն ուղարկել։ Իշխան Սարգսյանի խոսքերով՝ ցանկացած անձ կամ պաշտոնյա կարող է կանգնել իրենց կողքին՝ գիտակցելով իրենց անձնուրաց պայքարը։
Ազատամարտիկները պահանջում են սոցիալական փաթեթի բարելավում, թոշակների բարձրացում, տրանսպորտից անվճար օգտվելու արտոնություն, կոմունալ վճարների 50 տոկոս զեղչ: Օրեր առաջ նրանց հետ հանդիպել էր վարչապետ Տիգրան Սարգսյանը եւ մեկ ամիս ժամանակ խնդրել՝ խնդիրն ուսումնասիրելու համար։
