Վերահաշվարկ կիրականացվի
Սեպտեմբերի 23-ին կայացած տեղական ինքնակառավարման մարմինների ընտրությունների քվեարկության արդյունքների վերահաշվարկի պահանջով թեկնածուներից և վստահված անձանցից ընդհանուր առմամբ ստացվել է 24 դիմում: Դրանցից 9-ը վերաբերում են համայնքի ղեկավարի, իսկ 15-ը` ավագանու անդամի ընտրությունների արդյունքներին:
Բացի այդ, Արծվաբերդ գյուղական համայնքի երկու ընտրատեղամասերում համայնքի ղեկավարի և ավագանու անդամի ընտրությունների քվեարկության արդյունքների վերահաշվարկ իրականացնելու նախաձեռնությամբ հանդես է եկել թ.41 ընտրատարածքային ընտրական հանձնաժողովը:
Այսպիսով, վերահաշվարկի ենթակա են 6 գյուղական` Խաչաղբյուր, Բուժական, Գլաձոր, Արփի, Բաղանիս, Արծվաբերդ, և 2 քաղաքային` Աբովյան, Այրում, համայնքների ղեկավարի ընտրությունների 11 ընտրատեղամասերի քվեարկության արդյունքները: Ընդ որում` Աբովյանում 3 ընտրատեղամասերի արդյունքների վերահաշվարկի պահանջ է ներկայացված:
Վերահաշվարկի ենթակա են նաև 8 համայնքների 18 ընտրատեղամասերում ավագանու անդամի ընտրությունների քվեարկության արդյունքները: Այդ թվում` Աշտարակի 7, Սևան քաղաքի 2 և Նոյեմբերյանի մեկ ընտրատեղամասերում:
Ընտրությունների արդյունքների ամփոփումը կիրականացվի սեպտեմբերի 28-ին` հիմք ընդունելով վերահաշվարկի արդյունքները:
«ՓԱՍՏԻՆՖՈ»
