«Աշտարակ կաթը» գյուղացուն պարտք է
Ծատրյանների գոմում մի քանի օր հետո նորածին հորթուկ կհայտնվի: Նշան անունով կովին այլեւս դաշտ չեն ուղարկում, պետք է ծնի: Այս տանը կաթի եւ կաթնամթերքի պակաս երբեք չի զգացվում:
Ծատրյանները 6 կթու կովերից ամռանը մոտ 70 լիտր կաթ են ստանում:
Սյունիքի մարզի Բնունիս գյուղում վերջին մեկ տարում կթու կովերի գլխաքանակը ավելացել է: Ինչը համայնքի ղեկավար Վլադիմիր Հովհաննիսյանը պայմանավորում է կաթի գնի բարձրացմամբ: Այս տարի սակայն «Աշտարակ կաթ» ընկերությունը գյուղացիներից կաթը մթերել է 1 լիտրը 90-95 դրամով:
«Հողից դուրս եկած ջուրը 160 դրամով են ծախում, կաթը՝ 90 դրամով են ընդունում»,- ասում է Սերյոժա Ծատրյանը։
Բացի այդ՝ «Աշտարակ կաթը» նրանց եւս գումարներ է պարտք:
Տոլորս, Բնունիս, Ախլաթյան, Տորունիք, Արեւիս, Դաստակերտ համայնքների բնակիչներին «Աշտարակ կաթ» ընկերությունը պարտք է մոտ 20 մլն դրամ։ Ըստ բնակիչների՝ ընկերությունը վերջին վճարումը կատարել է 10 օր առաջ՝ հունիսի առաջին կեսին մթերած կաթի դիմաց։
