Միջերկրածովյան խորհրդարանական վեհաժողովում Հայաստանին շնորհվել է դիտորդի կարգավիճակ
Աջակցիր «Ա1+»-ինՀՀ ԱԺ նախագահի տեղակալ Հակոբ Արշակյանը մայիսի 7-8-ը Բուդվայում անցկացվող Միջերկրածովյան խորհրդարանական վեհաժողովի 20-րդ լիագումար նիստի շրջանակում մասնակցել է Միջերկրածովյան խորհրդարանական վեհաժողովի անդամ և գործընկեր երկրների խորհրդարանների նախագահների առաջին գագաթնաժողովին:
Գագաթնաժողովի շրջանակում կայացել է Հայաստանին Միջերկրածովյան խորհրդարանական վեհաժողովում դիտորդի կարգավիճակի շնորհման հանդիսավոր արարողությունը:
ՀՀ ԱԺ նախագահի տեղակալ Հակոբ Արշակյանի և Միջերկրածովյան խորհրդարանական վեհաժողովի նախագահ Ջուլիո Չենտեմերոյի կողմից ստորագրված փաստաթղթով կողմերը վերահաստել են Միջերկրածովյան խորհրդարանական վեհաժողովի և Հայաստանի Հանրապետության Ազգային ժողովի հանձնառությունը պահպանելու ու խորացնելու համագործակցությունը՝ նպաստելով ընդհանուր արժեքների և նպատակների առաջմղմանը Եվրո-Միջերկրածովյան ու Ծոցի տարածաշրջաններում, ինչպես նաև դրանցից դուրս:
Միջոցառման ընթացքում Հակոբ Արշակյանը հանդես է եկել ելույթով «Խորհրդարանական դիվանագիտությունը՝ որպես ժողովրդավարական ինստիտուտների դիմակայունության հենասյուն» թեմայով:
ՀՀ ԱԺ փոխնախագահը նաև կարճ շփումներ է ունեցել տարբեր երկրների գործընկերների հետ:
Գագաթնաժողովի աշխատանքներին մասնակցել են Միջերկրածովյան խորհրդարանական վեհաժողովի անդամ և գործընկեր երկրների խորհրդարանների պատվիրակություններ՝ ներկայացված խորհրդարանների նախագահների, փոխնախագահների և բարձրաստիճան ներկայացուցիչների մակարդակով:
