ԵՄ-ն կվերանայի Հայաստանի հետ ճանապարհային քարտեզը

Դեկտեմբերի 2-ին Եվրոպական միություն-Հայաստանի Հանրապետություն 6-րդ գործընկերության խորհուրդը կգլխավորի Հայաստանի արտաքին գործերի նախարար Արարատ Միրզոյանը։

ԵՄ պատվիրակությունը կգլխավորի ԵՄ արտաքին գործերի և անվտանգության քաղաքականության բարձր ներկայացուցիչ Կայա Կալլասը։

ԵՄ կողմից նիստին կմասնակցի նաև ընդլայնման հարցերով հանձնակատար Մարտա Կոսը։

Կողմերը նախ կվերանայեն ԵՄ-Հայաստան հարաբերությունների հիմնական ասպեկտները՝ կենտրոնանալով ԵՄ-Հայաստան համապարփակ և ընդլայնված գործընկերության համաձայնագրի (CEPA) և վերանայված ճանապարհային քարտեզի իրականացման վրա։

Այնուհետև նրանք կփոխանակեն կարծիքներ երկկողմ քաղաքական երկխոսության վերաբերյալ՝ ընդգրկելով բարեփոխումներ, ժողովրդավարություն, իրավունքի գերակայություն և մարդու իրավունքներ։ Խորհուրդը կքննարկի նաև միգրացիայի, շարժունակության և վիզաների ազատականացման երկխոսության հարցերը։

Բացի այդ, ԵՄ-ն և Հայաստանը կքննարկեն տնտեսական, առևտրային և ոլորտային համագործակցությունը՝ անդրադառնալով Հայաստանի էներգետիկ ոլորտի բարեփոխումներին, վերականգնվող էներգիային, ինչպես նաև ներդրումներին տնտեսական զարգացման և ներառական կապակցվածության ոլորտներում։ Այս մասին հայտնում են ԵՄ-ից։ Վերջում կողմերը կանդրադառնան տարածաշրջանային և միջազգային զարգացումներին,  ներառյալ Հայաստան-Ադրբեջան խաղաղ գործընթացը, ինչպես նաև անվտանգության և պաշտպանության ոլորտում համագործակցությունը։