Ինչ է կատարվում «ահաբեկչությունից զերծ Թուրքիա»-ում․ ԵԽԽՎ համազեկուցողները մտահոգված են

«Մենք խորապես մտահոգված ենք վերջին իրադարձություններով և Թուրքիայում ժողովրդավարության շարունակական հետընթացով»,-այս մասին հայտարարություն են   տարածել ԵԽԽՎ-ի՝ Թուրքիայի  հարցով մոնիտորինգի համազեկուցողներ Դեյվիդ Բլենկաթրան (Միացյալ Թագավորություն) և Շտեֆան Շեննախը (Ավստրիա)։

Նրանք  մասնավորապես  մտահոգված են ընդդիմադիր կուսակցության՝ Ժողովրդահանրապետական  kուսակցության (CHP)և նրա անդամների նկատմամբ աճող քաղաքական ճնշմամբ  ու դատական հետապնդումներով։

2025 թվականի մարտից ի վեր CHP-ի առաջնորդը և Ստամբուլի քաղաքապետ Էքրեմ Իմամօղլուն, որը հնարավոր նախագահական թեկնածու է, շարունակում է մնալ կալանքի տակ կեղծ կոռուպցիոն մեղադրանքների հիման վրա՝ չնայած Վեհաժողովի կոչերին անհապաղ ազատ արձակել նրան ( Բանաձև 2597 (2025))։

Մարտից ի վեր CHP -ի հարյուրավոր քաղաքապետներ, քաղաքային պաշտոնյաներ ձերբակալվել են ահաբեկչության և կոռուպցիոն մեղադրանքներով։

«Մենք նաև մտահոգված ենք CHP կուսակցության վրա վերջերս կատարված հարձակումներով։ Սեպտեմբերի 2-ին Ստամբուլի դատարանը չեղյալ է համարել 2023 թվականի հոկտեմբերին անցկացված կուսակցության Ստամբուլի նահանգային համագումարի օրինականությունը, հեռացրել է ընտրված Ստամբուլի ղեկավարությանը և նշանակել նոր ժամանակավոր ադմինիստրացիա այն խմբակցությունից, որը պարտվել է տեղական ընտրություններում։  CHP-ի ապագան և ներկայիս ղեկավարության ճակատագիրը նույնպես սպառնալիքի տակ են՝ կախված 2023 թվականի համագումարում պատգամավորների ընտրության ենթադրյալ խախտումների վերաբերյալ իրավական ընթացակարգերի արդյունքներից։

Այս բոլոր զարգացումները թվում են որպես փորձ՝ թուլացնելու Թուրքիայի գլխավոր ընդդիմադիր կուսակցությանը։ Դրանք խարխլում են քաղաքական բազմակարծության սկզբունքը, ընտրողների կամքը և վստահությունը ժողովրդավարական կառավարման նկատմամբ։ Սա առավել հիասթափեցնող է հաշվի առնելով, որ «ահաբեկչությունից զերծ Թուրքիա» գործընթացի սկիզբը հույսեր էր հարուցել երկրում կայուն խաղաղություն և քաղաքական կայունություն ապահովելու վերաբերյալ։

Այս զարգացումները ավելի անհանգստացնող են, երբ դիտարկվում են այլ գործելակերպերի հետ միասին, որոնք նախկինում դատապարտվել են Վեհաժողովի և Եվրոպայի խորհրդի այլ մարմինների կողմից, ինչպիսիք են ընդդիմադիր քաղաքական գործիչների, քաղաքացիական հասարակության ակտիվիստների, լրագրողների և կառավարության քննադատների շարունակական ճնշումները. նախաքննական կալանքի չարաշահումը. դատական համակարգի քաղաքականացումը. և հավաքների ու արտահայտման ազատությունների խախտումները»,-ասված է  հայտարարության մեջ։

Համազեկուցողները լրջորեն մտահոգված են ոչ միայն մարդու իրավունքների և օրինականության խախտումներով, այլ նաև Թուրքիայում ժողովրդավարության ապագայով։

«Քանի որ CHP -ի իրավունքների պաշտպանությունը կարևոր է երկրի ժողովրդավարական ապագան պաշտպանելու համար, մենք կոչ ենք անում իշխանություններին անհապաղ դադարեցնել բոլոր դատական հետապնդումները և քաղաքականորեն պայմանավորված քննությունները, որոնք ուղղված են CHP -ի ներկայացուցիչների դեմ։

Մենք կրկին կոչ ենք անում թուրք իշխանություններին պահպանել ժողովրդավարական արժեքները, օրինականությունը և մարդու իրավունքները՝ համապատասխան իրենց պարտավորություններին որպես Եվրոպայի խորհրդի անդամ»,-ասված է հայտարարության  մեջ։