ԱՄՆ միջնորդությամբ` Հայաստանի ու Ադրբեջանի միջև խաղաղության պայմանագրի կնքումը կարող է պրոբլեմատիկ լինել Հայաստանի արտաքին և անվտանգային միջավայրերի համար։ Այս մասին այսօր մամուլի ասուլիսի ժամանակ հայտարարեց ՀՀԿ փոխնախագահ Արմեն Աշոտյանը։

Ավելի վաղ Վաշինգտոնում Կովկասի հարցերով լրագրող Ալեքս Ռաուֆօղլուն X սոցցանցում հղում անելով բազմաթիվ աղբյուրների` հայտնել էր, որ Բաքուն և Երևանը պատրաստ են արդեն այս շաբաթ Վաշինգտոնում հայտարարել խաղաղության համաձայնագիր կնքելու իրենց մտադրության մասին։ Նրա խոսքով՝ օգոստոսի 8-ին ԱՄՆ նախագահ Դոնալդ Թրամփը նախատեսում է Սպիտակ տանն ընդունել Հայաստանի և Ադրբեջանի առաջնորդներ Նիկոլ Փաշինյանին և Իլհամ Ալիևին։ Այսօր արդեն միջազգային մամուլը գրեց, թե Հայաստանն ու Ադրբեջանը ուրբաթ Վաշինգտոնում փոխըմբռնման հուշագիր կստորագրեն՝ պարտավորվելով ձգտել խաղաղության։

Արմեն Աշոտյանը շեշտում է` ԱՄՆ–ի միջնորդության արդյունքը մեկ անգամ չէ, որ տեսել ենք, և օրինակ է բերում 2020 թ.–ի հոկտեմբերի 26-ը, երբ 44 օրյա պատերազմի ընթացքում ԱՄՆ–ն փորձեց միջնորդ լինել հրադադար հաստատելու համար։

ՀՀԿ փոխնախագահը կարծում է, որ ԱՄՆ նախագահն իր գործողություններով պարզապես բոնուսներ է հավաքում Նոբելյան մրցանակի համար։

«Ինչպես կոմպյուտերային խաղերում է լինում` Սուպեր Մարիոյի նման սնկեր է ուտում։ Հայ– ադրբեջանական կոնֆլիկտի, թեկուզև իր ձևով` «թրամփավարի» հանգուցալուծումը կարող է լինել քաղաքական բոնուս այդ նոբելյան կրեդիտ քարտի վրա»,– հավելեց նա։