Կարող ենք արձանագրել, որ ունեցել ենք դրական արդյունքներ․ Բաղդասարյան
Աջակցիր «Ա1+»-ին8-րդ գումարման ՀՀ Ազգային ժողովի պատգամավոր Նազելի Բաղդասարյանը, իր ֆեյսբուքյան էջում անդրադառնալով ԵԽԽՎ-ի աշնանային նստաշրջանին, նշել է, որ ամփոփելով՝ կարող ենք արձանագրել, որ ունեցել ենք դրական արդյունքներ:
«Նախևառաջ, Հայաստանի համապետական ընտրությունների զեկույցն ընդգծում է Հայաստանում ժողովրդավարությանն ուղղված գործընթացների ամրապնդումը: Երկրորդը՝ Լեռնային Ղարաբաղի հակամարտության հումանիտար հետևանքների վերաբերյալ զեկույցն էր, որը հետևողական աշխատանքի և ջանքերի շնորհիվ ստացավ ԵԽԽՎ պատվիրակների ձայների մեծամասնությունը:
Սա նաև նախորդ գումարման ԱԺ ԵԽԽՎ-ի պատվիրակության անդամների ակտիվ գործունեության արդյունքն էր: Որպես հայաստանյան պատվիրակության մշտական նոր անդամ կարող եմ փաստել, որ միջազգային կառույցներում շարունակական աշխատանք է պահանջվում։ Հատկապես ստեղծված իրավիճակում խորհրդարանական դիվանագիտությունը չափազանց կարևոր տեղ է զբաղեցնում:
Տեղեկացնեմ, որ Եվրոպայի խորհրդի խորհրդարանական վեհաժողովում ընդգրկված եմ երկու հանձնաժողովում՝ «Միգրացիայի, փախստականների և տեղահանվածների», ինչպես նաև «Իրավական հարցերի և մարդու իրավունքների հանձնաժողովում»:
Կփորձեմ գիտելիքներս և հմտություններս լավագույնս ծառայեցնել ի նպաստ մեր երկրի»:
