Գուցե այս ժամանակահատվածում որոշակի զգուշավորություն է պետք․ Սիսակ Գաբրիելյանը՝ ԱԱԾ հայտարարության մասին (տեսանյութ)
Աջակցիր «Ա1+»-ինԻմ կարծիքով՝ զուտ չվնասելու տրամաբանությամբ ենք շարժվում առաջ։ «Իմ քայլը» խմբակցության պատգամավոր Սիսակ Գաբրիելյանն այսպես արձագանքեց ԱԱԾ հայտարարությանը՝ ուղղված լրատվամիջոցների՝ Սյունիքում նկարահանումներ անելու համար հատուկ թույլտվություն ստանալու վերաբերյալ։
«Ըստ էության՝ ռազմական դրությամբ պայմանավորված՝ Սյունիքում որոշակի գործընթացներ են ընթանում, և ինչ-որ պահից սկսած այնտեղ ազատ ելումուտ կլինի»,-նշեց Գաբրիելյանը՝ վստահեցնելով՝ ԱԱԾ-ն որևէ բան չի ուզում թաքցնել․
«Այն, ինչ դուք եք լուսաբանում, ոչ միայն հայաստանյան լսարանի համար է, այլ նաև հարևան երկրների համար է, գուցե այս ժամանակահատվածում որոշակի զգուշավորություն է պետք»։
Սիսակ Գաբրիելյանի խոսքով՝ այդպիսի կարգ նախկինում էլ կար, հիմա երևի առավել համակարգելու համար է ԱԱԾ-ի հայտարարությունը։
Ինչ վերաբերում է Տիգրան Ավինյանի հայտարարությանը, թե Ադրբեջանի հետ լրացուցիչ փաստաթուղթ կա Գորիս-Դավիթ Բեկ ճանապարհահատվածի հետ կապված, «Իմ քայլը» խմբակցության պատգամավոր Հայկ Գևորգյանը պարզաբանում է․
«Դուք գիտեք, որ Գորիս-Կապան հատվածում, օրինակ, 21 կմ-ն անցնում է Հայաստանի միջազգայնորեն ճանացված սահմաններից դուրս, այսինքն՝ Ադրբեջանի միջազգայնորեն ճանաչված սահմաններով, բայց ոչ մի վայրկյան այդ ճանապարհը չի փակվել, դա պայմանավորվածությունների արդյունք է, որ այդ ճանապարհը պիտի գործի և գործում է»։
Սիսակ Գաբրիելյանն իր հերթին հավելեց, թե սյունեցիներն անհանգստանում են ստեղծված իրավիճակով, քանի որ վերջին 25-30 տարինեիներին նման իրավիճակներ չեն եղել․
«Ինձ որևէ տեղեկատվություն չի հասել, որ սահմանափակվել է ազատ տեղաշարժը»,-նշեց Գաբրիելյանը։
Ինչ վերաբերում է լրագրողներից մեկի հայտարարությանը, թե ԱԱԾ-ն արգելել է բնակիչներից մեկի տանը նկարահանում իրականացնել, Գաբրիելյանն ասաց՝ կա այնտեղ մի հատված, որտեղ ճանապարհի մի հատվածը ադրբեջանական, մյուս մասը՝ հայկական վերահսկողության տակ է, այդ հատվածին մոտ կա մի տուն․ չի բացառում, որ նկարահանումները եղել են այդ տանը։
